അയോദ്ധ്യ രാമക്ഷേത്രം: പ്രതിഷ്ഠാ ചടങ്ങിന് മണിക്കൂറുകള് മാത്രം, നഗരത്തിലെമ്പാടും വന് സുരക്ഷാവിന്യാസം
അയോദ്ധ്യ: ഹൈന്ദവ വിശ്വാസികള് തികഞ്ഞ ഭക്തിയോടെയും ആകാംക്ഷയോടെയും കാത്തിരിക്കുന്ന രാമക്ഷേത്രത്തിലെ പ്രാണ പ്രതിഷ്ഠാ ചടങ്ങിന് ഇനി മണിക്കൂറുകള് മാത്രം. ഉച്ചയ്ക്ക് 12.20ന് ആരംഭിക്കുന്ന പ്രധാന ചടങ്ങുകള് ഉച്ചയ്ക്ക് ഒന്നിന് അവസാനിക്കും. തുടര്ന്ന് വേദിയില് ദര്ശകരും പ്രമുഖരും ഉള്പ്പെടെ ഉള്ള ഏഴായിരത്തിലധികം ആളുകളെ പ്രധാനമന്ത്രി നരേന്ദ്ര മോദി അഭിസംബോധന ചെയ്യും.
മുഴുവന് പരിപാടിയും തത്സമയം സംപ്രേക്ഷണം ചെയ്യും. നഗരത്തിലുടനീളം കര്ശന സുരക്ഷയാണ് ഒരുക്കിയിരിക്കുന്നത്. ടണ് കണക്കിന് പൂക്കളും വര്ണ്ണ വിളക്കുകളും കൊണ്ട് ക്ഷേത്രം അലങ്കരിച്ചിരിക്കുകയാണ്. ചടങ്ങിലേക്കുള്ള പ്രത്യേക ക്ഷണിതാക്കള് ഇന്നലെ തന്നെ എത്തിത്തുടങ്ങിയിരുന്നു. ഒരുകാലത്ത് ശാന്തമായ നഗരമായിരുന്ന അയോധ്യ ഇപ്പോള് പുതിയ അടിസ്ഥാന സൗകര്യങ്ങളാല് തിളങ്ങുകയാണ്.
ബഹുവര്ണ്ണ പൂക്കളാല് നഗരത്തെ അലങ്കരിച്ചിരിക്കുകയാണ്. ശ്രീരാമന്, സീത, ലക്ഷ്മണന്, ഹനുമാന് എന്നിവരുടെ വേഷം ധരിച്ച ആളുകള് തെരുവുകളില് പരേഡ് നടത്തി. 'ജയ് ശ്രീറാം' എന്നെഴുതിയിരിക്കുന്ന കവാടങ്ങളും കമാനങ്ങളും നഗരത്തിലുടനീളം സ്ഥാപിച്ചിട്ടുണ്ട്. രാജ്യം മുഴുവന് രാമന്റെ നാമം ജപിക്കുകയാണെന്ന് ഉത്തര്പ്രദേശ് ഉപമുഖ്യമന്ത്രി കേശവ് പ്രസാദ് മൗര്യ പറഞ്ഞു.
കെട്ടിടങ്ങളുടെ മുകളിലെല്ലാം കാവി പതാകകള് സ്ഥാപിച്ചിരിക്കുകയാണ്. ലതാ മങ്കേഷ്കര് ചൗക്കില് ശ്രീരാമന്റെയും രാമക്ഷേത്രത്തിന്റേയും കട്ടൗട്ടുകള് സ്ഥാപിച്ചിട്ടുണ്ട്. അതേസമയം വലിയ സുരക്ഷാ വിന്യാസമാണ് നഗരത്തില് ഒരുക്കിയിരിക്കുന്നത്. ഡ്രോണുകള് ഗ്രൗണ്ടില് പരിശോധന നടത്തിവരികയാണ്. അയോധ്യയിലെ 'യെല്ലോ സോണില്' മുഖം തിരിച്ചറിയല് സാങ്കേതികവിദ്യയുള്ള 10,715 എഐ ക്യാമറകളുണ്ട്.
അടിയന്തര പ്രതികരണങ്ങള്ക്കായി ദേശീയ ദുരന്ത നിവാരണ സേനയുടെയും (എന് ഡി ആര് എഫ്) സംസ്ഥാന ദുരന്ത നിവാരണ സേനയുടെയും (എസ് ഡി ആര് എഫ്) ടീമുകളെ വിന്യസിച്ചിട്ടുണ്ട്. എസ് ഡി ആര് എഫ് സംഘങ്ങള് സരയൂ നദിയില് ബോട്ട് പട്രോളിങ് നടത്തും. യുപി സ്പെഷ്യല് സെക്യൂരിറ്റി ഫോഴ്സ് (എസ് എസ് എഫ്) ആന്റി-ഡ്രോണ് സംവിധാനം വിന്യസിച്ചിട്ടുണ്ട്,
ക്ഷേത്രനഗരത്തിലെ സുരക്ഷ വര്ധിപ്പിക്കുന്നതിനുള്ള ശ്രമങ്ങളുടെ ഭാഗമായി അയോധ്യ, മൈന് വിരുദ്ധ ഡ്രോണുകള്ക്കൊപ്പം എഐ ഘടിപ്പിച്ച ഡ്രോണുകളുടെ നിരീക്ഷണത്തിലാണ് എന്ന് ഒരു മുതിര്ന്ന പൊലീസ് ഉദ്യോഗസ്ഥന് പറഞ്ഞു. ആന്റി-മൈന് ഡ്രോണുകള് ഭൂമിയില് നിന്ന് ഒരു മീറ്റര് ഉയരത്തില് പറക്കുന്നു, കൂടാതെ ഭൂഗര്ഭ സ്ഫോടകവസ്തുക്കള് കണ്ടെത്തുന്നതിനുള്ള സ്പെക്ട്രോമീറ്റര് തരംഗദൈര്ഘ്യം കണ്ടെത്തല് പോലുള്ള നൂതന സാങ്കേതികവിദ്യയും സജ്ജീകരിച്ചിരിക്കുന്നു.
Click it and Unblock the Notifications
Sign in with Google