ഗൗരി ലങ്കേഷിനെ നായയാക്കി ശ്രീരാമസേന നേതാവ്! ചില നായ്ക്കള് ചാകുമ്പോള് മോദി എന്തിന് പ്രതികരിക്കണം
ദില്ലി: തീവ്ര ഹിന്ദുത്വവാദികളാല് കൊല്ലപ്പെട്ട മാധ്യമപ്രവര്ത്തക ഗൗരി ലങ്കേഷിനെ നായയോട് ഉപമിച്ച് ശ്രീരാമസേന നേതാവ് പ്രമോദ് മുത്തലിഖ്.ഗൗരീ ലങ്കേഷ് വധത്തില് മോദി എന്തുകൊണ്ടാണ് മൗനം സ്വീകരിക്കുന്നതെന്ന മാധ്യമങ്ങളുടെ ചോദ്യത്തിന് ഒരു പൊതുചടങ്ങിനിടെയായിരുന്നു പ്രമോദ് മുത്തലിഖ് പരസ്യമായി പ്രതികരിച്ചത്. കര്ണാടകത്തില് ഒരു നായ ചത്തതിന് എന്തിനാണ് പ്രധാനമന്ത്രി നരേന്ദ്ര മോദി പ്രതികരിക്കുന്നതെന്നായിരുന്നു മുത്തലിഖ് ചോദിച്ചത്.
ഗൗരി ലങ്കേഷ് വധത്തില് കഴിഞ്ഞ ദിവസമാണ് ശ്രീരാമ സേനയുടെ വിജയപുര ജില്ലാ പ്രസിഡന്റ് കൂടിയായ രാകേഷ് മേത്തിനെ പ്രത്യേക അന്വേഷണ സംഘം അറസ്റ്റ് ചെയ്തത്. കൊലപാതകത്തില് ശ്രീരാമസേനയുടെ പങ്കിനെ കുറിച്ച് അന്വേഷണം വ്യാപിപ്പിച്ചതിനിടയിലാണ് മുത്തലിഖിന്റെ അവഹേളനപരമായ പ്രസ്താവന.അതേസമയം തന്റെ പ്രസ്താവനയെ വളച്ചൊടിക്കുകയായിരുന്നെന്ന് മുത്തലിഖ് പറഞ്ഞു. കര്ണാടകത്തില് നടക്കുന്ന എല്ലാ മരണങ്ങളിലും പ്രധാനമന്ത്രി പ്രതികരിക്കേണ്ടതുണ്ടോയെന്നാണ് താന് ഉദ്ദേശിച്ചതെന്നും മുത്തലിഖ് വിശദീകരിച്ചു.