ലാലു പ്രസാദിന്റെ മകനും ബാബ രാംദേവിന്റെ മരുമകളും തമ്മില് വിവാഹിതരായേക്കും
വിവാഹക്കാര്യം സംബന്ധിച്ച് ഇരു വീട്ടുകാരും പ്രതികരിച്ചിട്ടില്ലെങ്കിലും ഇരുവരുമായി അടുപ്പമുള്ളവര് വിവാഹത്തെക്കുറിച്ച് സൂചന നല്കി.
ദില്ലി: ബിഹാറിലെ മഹാസഖ്യമെന്ന രാഷ്ട്രീയ മുന്നണിയെ ബാധിച്ചേക്കാവുന്ന വിധത്തില് ഒരു വിവാഹം അണിയറയില് ഒരുങ്ങുന്നതായി റിപ്പോര്ട്ട്. ബിജെപിയുടെയും പ്രധാനമന്ത്രിയുടെയും അടുത്തയാളും യോഗാ ഗുരുവുമായ ബാബ രാംദേവിന്റെ മരുമകളും ആര്ജെഡി ചീഫ് ലാലു പ്രസാദിന്റെ ഇളയ മകനും തമ്മില് വിവാഹിതരായേക്കുമെന്നാണ് റിപ്പോര്ട്ടുകള് പറയുന്നത്.
വിവാഹക്കാര്യം സംബന്ധിച്ച് ഇരു വീട്ടുകാരും പ്രതികരിച്ചിട്ടില്ലെങ്കിലും ഇരുവരുമായി അടുപ്പമുള്ളവര് വിവാഹത്തെക്കുറിച്ച് സൂചന നല്കി. നിലവില് ബിഹാറിലെ ആരോഗ്യവകുപ്പ് മന്ത്രിയാണ് ലാലുവിന്റെ ഇളയമകന് തേജ് പ്രതാപ്. ഏതാണ്ട് 2,500 കോടിയോളം രൂപയുടെ ആസ്തിയുള്ള പതഞ്ജലി ആയുര്വേദത്തിന്റെ തലവന് ബാബാ രാംദേവുമായുള്ള പുതിയ ബന്ധം ബിഹാര് രാഷ്ട്രീയത്തെ മാത്രമല്ല ദേശീയ രാഷ്ട്രീയത്തേയും മാറ്റി മറിച്ചേക്കുമെന്ന് ചില ദേശീയ മാധ്യമങ്ങള് റിപ്പോര്ട്ട് ചെയ്യുന്നു.
ആര്ജെഡി ചീഫ് ലാലു പ്രസാദിന് ബിജെപിയുമായി സംഖ്യമുണ്ടാക്കാനുള്ള ഇടനിലക്കാരനായി ഭാവിയില് രാംദേവ് മാറിയേക്കും. ലാലുവിന്റെ മരുമകനെ ബിഹാറിലെ പതഞ്ജലിയുടെ ഡിസ്ട്രിബ്യൂട്ടര് ആയി ഇതിനകം തന്നെ നിയമിച്ചത് ഭാവിയിലെ ബന്ധത്തിന്റെ സൂചനയായാണ് കണക്കാക്കുന്നത്.
ഉത്തര് പ്രദേശ് ഉള്പ്പെടെയുളള സംസ്ഥാനങ്ങളില് തെരഞ്ഞെടുപ്പ് നടക്കാനിരിക്കെയാണ് വിവാഹത്തിലൂടെ പുതിയ സഖ്യസാധ്യത ഒരുങ്ങുന്നത്. ഭാവിയില് മകനെ ഉത്തര് പ്രദേശ് മുഖ്യമന്ത്രിവരെയാക്കാന് ലാലുവിന് ബിജെപി ബന്ധംകൊണ്ട് കഴിയുമെന്നിരിക്കെ മഹാസഖ്യത്തിലെ മറ്റ് രാഷ്ട്രീയ കക്ഷികള് പുതിയ രാഷ്ട്രീയ നീക്കത്തെ സൂക്ഷമമായി നിരീക്ഷിക്കുകയാണ്.