നടി രമ്യ മാപ്പ് പറഞ്ഞു;

ബാംഗ്ലൂര്‍: കോണ്‍ഗ്രസ് എം എല്‍ എയും സിനിമാ നടനുമായ അംബരീഷുമായി ഉണ്ടായ വിവാദത്തില്‍ നടി രമ്യ മാപ്പ് പറഞ്ഞു. മാണ്ഡ്യ മണ്ഡലത്തില്‍ നിന്നുള്ള കോണ്‍ഗ്രസിന്റെ എം പിയാണ് സാന്‍ഡല്‍വുഡ് ക്വീന്‍ എന്നറിയപ്പെടുന്ന ഗ്ലാമര്‍ റാണി രമ്യ.

അംബരീഷിനെ രാഷ്ട്രീയത്തിലേക്ക് കൊണ്ടുവന്നത് തന്റെ അച്ഛനും എസ് എം കൃഷ്ണയും ചേര്‍ന്നാണ് എന്ന രമ്യയുടെ പ്രസ്താവന വിവാദമായ പശ്ചാത്തലത്തിലാണ് രമ്യ മാപ്പ് പറഞ്ഞത്. താന്‍ പറഞ്ഞത് അങ്ങനെയല്ല എന്നും ജനതാദളില്‍ നിന്നും അംബരീഷിനെ കോണ്‍ഗ്രസിലേക്ക് കൊണ്ടുവന്നത് തന്റെ അച്ഛനും എസ് എം കൃഷ്ണയുമാണ് എന്നുമാണ് രമ്യ പറയുന്നത്.

രമ്യയുടെ പ്രസ്താവന അംബരീഷിന്റെ ആരാധകര്‍ക്കിടയില്‍ കടുത്ത വിമര്‍ശനത്തിന് ഇടയാക്കിയിരുന്നു. ആ പശ്ചാത്തലത്തിലാണ് അംബരീഷിന്റെ ആരാധകരോട് രമ്യ മാപ്പ് പറഞ്ഞത്. അംബരീഷ് തന്റെ രാഷ്ട്രീയഗുരു ആണെന്നും അദ്ദേഹത്തെ അപമാനിക്കാന്‍ താന്‍ ഒരിക്കലും തയ്യാറാകില്ല എന്നും രമ്യ പറഞ്ഞു.

പാര്‍ട്ടിക്കുളളിലെ സ്വാര്‍ഥ താല്‍പര്യക്കാരാണ് തനിക്കെതിരെ കളിക്കുന്നതെന്ന് രമ്യ കുറ്റപ്പെടുത്തി. നിക്ഷിപ്ത താല്‍പര്യക്കാരാണ് എന്റെ പ്രസ്താവന വിവാദമാക്കിയത്. മാണ്ഡ്യയില്‍ നിന്നും വീണ്ടും മത്സരിക്കുമോ എന്ന് പ്രഖ്യാപിച്ചിട്ടില്ല. അരലക്ഷത്തോളം വോട്ടുകള്‍ക്കാണ് ജനതാദളിലെ സി എസ് പുട്ടരാജുവിനെ തോല്‍പിച്ച രമ്യ പതിനഞ്ചാം പാര്‍ലമെന്റിലെ ഏറ്റവും പ്രായം കുറഞ്ഞ അംഗമായത്.

English summary

Actress-turned-MP Ramya, who faced brickbats from Ambareesh's fans for making remarks about Ambareesh's political entry, has finally apologized