ബലാത്സംഗം, അപമാനിക്കൽ; അനുരാഗ് കശ്യപിനെതിരെ പരാതി നൽകി നടി, മീ ടു ആരോപണത്തിന് പിന്നാലെ

ദില്ലി; ബോളിവുഡ് സംവിധായകനും നിർമ്മാതാവും നടനുമായ അനുരാഗ് കശ്യപിനെതിരെ പരാതി നൽകി നടി. ബലാത്സംഗം, തെറ്റായ സമീപനം, അപമാനിക്കൽ എന്നീ കുറ്റങ്ങൾ ആരോപിച്ചാണ് പരാതി നൽകിയിരിക്കുന്നത്. നടി പരാതി നൽകിയെന്നും നടിയുടെ മൊഴി രേഖപ്പെടുത്തിയതായും നടിയുടെ അഭിഭാഷകൻ മാധ്യമങ്ങളെ അറിയിച്ചു.

കഴിഞ്ഞ ദിവസമാണ് സംവിധായകന് എതിരെ ആരോപണവുമായി നടി രംഗത്തെത്തിയത്. തന്നെ ലൈംഗികമായി ഉപദ്രവിച്ച ശേഷം ഇത് സാരമുള്ള കാര്യമല്ലെന്നും തന്നോടൊപ്പം ജോലി ചെയ്ത ഹുമ ഖുറേഷി, മാഹി ഗിൽ എന്നീ താരങ്ങൾ ഒരു വിളിപ്പുറത്താണുള്ളതെന്നും അനുരാഗ് പറഞ്ഞതായി നടി ആരോപിച്ചിരുന്നു. സംവിധായകൻ ലഹരി ഉപയോഗിക്കുന്നതായും അപമര്യാദയായി പെരുമാറിയതായും നടി ആരോപിച്ചിരുന്നു. പിന്നാലെ പ്രധാനമന്ത്രി നരേന്ദ്ര മോദിയെ ടാഗ് ചെയ്ത് തന്നെ സഹായിക്കണമെന്ന് അഭ്യർത്ഥിച്ച് അവർ ട്വീറ്റ് ചെയ്യുകയും ചെയ്തിരുന്നു.

അതേസമയം ആരോപണത്തിൽ നടനെ പിന്തുണച്ച് നിരവധി പേർ രംഗത്തെത്തിയിരുന്നു. ആദ്യ ഭാര്യയും സിനിമാ എഡിറ്ററുമായ ആരതി ബജാജ്, രണ്ടാം ഭാര്യയും ബോളിവുഡ് അഭിനേത്രിയുമായ കൽക്കി കൊച്ച്ലിൻ, നടിമാരായ തപ്സി പന്നു, രാധിക ആപ്തെ, സൈയാമി ഖേർ എന്നിവരാണ് ഇതുവരെ അനുരാഗിനു പിന്തുണ അർപ്പിച്ചത്.

അതേസമയം നടിയുടെ ആരോപണം തന്നെ നിശബ്ദനാക്കാനുള്ള ശ്രമമാണ് എന്നായിരുന്നു അനുരാഗ് കശ്യപിന്റെ മറുപടി. താൻ സ്ത്രീകളോട് മോശമായി പെരുമാറുന്ന ആളല്ലെന്നും ആരോപണങ്ങൾ അടിസ്ഥാന രഹിതമാണെന്നും അനുരാഗ് പറഞ്ഞിരുന്നു.

English summary

Rape and humiliation; Actress files complaints against Anurag Kashyap