രാജ്യത്ത് പണലഭ്യത ഉറപ്പാക്കും; 50,000 കോടി രൂപയുടെ പദ്ധതികൾ പ്രഖ്യാപിച്ച് റിസര്‍വ് ബാങ്ക്

മുംബൈ: കോവിഡിന്‍റെ രണ്ടാം തരംഗം സൃഷ്ടിക്കുന്ന സാമ്പത്തിക ആഘാതം നേരിടാന്‍ ശക്തമായ നടപടികളുമായി റിസര്‍വ് ബാങ്ക്. രാജ്യത്ത് പണലഭ്യത ഉറപ്പാക്കാൻ 50,000 കോടി രൂപയുടെ പദ്ധതികൾ റിസർവ് ബാങ്ക് പ്രഖ്യാപിച്ചു. 2022 മാർച്ച് 31വരെയാണ് പദ്ധതി പ്രകാരം ആനുകൂല്യം ലഭിക്കുകയെന്നും ആര്‍ബിഐ ഗവര്‍ണ്ണര്‍ ശക്തികാന്ത ദാസ് അറിയിച്ചു. കോവിഡ് വ്യാപനത്തിന്‍റെ പശ്ചാത്തില്‍ രാജ്യത്തെ അഭിസംബോധന ചെയ്തുകൊണ്ട് സംസാരിക്കുകയായിരുന്നു അദ്ദേഹം.

കോവിഡ് പ്രതിരോധ നടപടികള്‍ക്ക് വായ്പ നൽകുന്നതിനാണ് പുതിയ പദ്ധതി പ്രഖ്യാപിച്ചത്. പദ്ധതി പ്രകാരം ബാങ്കുകൾക്ക് വാക്സിൻ നിർമ്മാതാക്കൾ, മെഡിക്കൽ സൗകര്യങ്ങൾ, ആശുപത്രികൾ എന്നിവ ഉള്‍പ്പടേയുള്ള സ്ഥാപനങ്ങളേയും രോഗികളേയും പിന്തുണയ്ക്കാന്‍ സാധിക്കും. സ്കീമിന് കീഴിൽ ബാങ്കുകള്‍ കോവിഡ് ലോൺ ബുക്ക് സൃഷ്ടിക്കും.

നിലവിലെ സാഹചര്യം നിരീക്ഷിച്ച് അതിന് അനുസൃതമായ പ്രതിരോധനടപടികളുമായി മുന്നോട്ട് പോകുമെന്നും ആർബിഐ ഗവർണർ ശക്തികാന്തദാസ് വ്യക്തമാക്കി. വ്യക്തികൾക്കും സൂക്ഷ്മ ചെറുകിട ഇടത്തരം സംരഭകര്‍ക്കുമായി ഒറ്റത്തവണ വായ്പ പുനഃ സംഘടന സംവിധാനത്തിന് റിസർവ് ബാങ്ക് വീണ്ടും അവസരം ഒരുക്കും. 2021 സെപ്റ്റര്‍ 21 വരെയാണ് ഇവര്‍ക്ക് വായ്പാ പുഃസംഘടനയ്ക്ക് അവസരം ഉണ്ടായിരിക്കുകയെന്നും അദ്ദേഹം അറിയിച്ചു.

ചെറുകിട ധനകാര്യ ബാങ്കുകൾക്ക് 500 കോടി രൂപ വരെ ആസ്തി വലുപ്പമുള്ള ചെറിയ മൈക്രോഫിനാൻസ് സ്ഥാപനങ്ങൾക്ക് വായ്പ നൽകാൻ അനുമതിയുണ്ടെന്നും ദാസ് പറഞ്ഞു. കഴിഞ്ഞ ഒരു മാസമായി സ്ഥിതിഗതികള്‍ വലിയതോതില്‍ മാറിയിട്ടുണ്ട്. ഇപ്പോഴത്തെ സാഹചര്യം വിലയിരുത്തി ക്രമപ്പെടുത്തിയതും സമയബന്ധിതവുമായ നയപരമായ പ്രവര്‍ത്തനങ്ങളുമായി റിസര്‍വ് ബാങ്ക് മുന്നോട്ടു പോകുമെന്നും ആര്‍ബിഐ ഗവര്‍ണ്ണര്‍ അറിയിച്ചു.

ആഗോള സമ്പദ്വ്യവസ്ഥയുടെ കാഴ്ചപ്പാട് വളരെ അനിശ്ചിതത്വത്തിലാണ്, മാത്രമല്ല അത് അപകടസാധ്യതകള്‍ക്ക് വിധേയവുമാണ്. കോവിഡിന്റെ രണ്ടാം തരംഗത്തെ തുടര്‍ന്നുള്ള നിയന്ത്രണ നടപടികള്‍ രാജ്യത്തെയും പ്രതികൂലമായും ബാധിക്കും. ഇതേസമയം, മൊത്തം ഡിമാന്‍ഡിലുള്ള കുറവ് ഒരു വര്‍ഷം മുമ്പത്തെ അപേക്ഷിച്ച് ഏറെ മെച്ചപ്പെട്ടതായും ശക്തികാന്ത ദാസ് വ്യക്തമാക്കി.

English summary

rBI announces On-tap liquidity of ₹50,000 crore