പുതിയ 100 രൂപാ നോട്ട് എത്തുന്നു; ലാവെന്റര്‍ നിറത്തില്‍, നോട്ടുകെട്ടുകള്‍ ലങ്കിമറയും, പഴയത്?

ദില്ലി: പുതിയ നൂറ് രൂപാ നോട്ട് റിസര്‍വ് ബാങ്ക് ഉടന്‍ പുറത്തിറക്കും. ലാവെന്റര്‍ നിറത്തിലുള്ളതായിരിക്കും നോട്ട്. ഇതിന്റെ മാതൃക പുറത്തുവിട്ടു. 2016 നവംബറിലെ നോട്ട് നിരോധനത്തിന് ശേഷം പുതിയ നോട്ടുകള്‍ പ്രത്യേക ഡിസൈനിലാണ് കേന്ദ്ര ബാങ്ക് പുറത്തിറക്കുന്നത്. ഈ ഗണത്തില്‍ തന്നെയാണ് പുതിയ നൂറ് രൂപയും വരുന്നത്.

ഗുജറാത്തിലെ പ്രശസ്തമായ റാണിയുടെ പടി കിണര്‍ ആലേഖനം ചെയ്താകും പുതിയ നൂറ് രൂപ എത്തുക. യുനസ്‌കോയുടെ ലോക പൈതൃക പട്ടികയില്‍ ഇടംപിടിച്ചതാണ് ഗുജറാത്തിലെ സരസ്വതി നദീതീരത്തുള്ള റാണി കി വാവ്.

ഒട്ടേറെ സുരക്ഷാ സവിശേഷതകളും പുതിയ നൂറ് രൂപാ നോട്ടിനുണ്ടെന്നാണ് റിപ്പോര്‍ട്ടുകള്‍. ലാവെന്റര്‍ നിറത്തിലായിരിക്കും നോട്ടുകള്‍. നോട്ട് നിരോധനത്തിന് ശേഷം ആര്‍ബിഐ 2000, 500, 200, 50, 10 രൂപാ നോട്ടുകള്‍ പുതിയ മാതൃകയില്‍ പുറത്തിറക്കിയിരുന്നു. പഴയ നോട്ടുകളുടെ വലിപ്പമുണ്ടാകില്ല പുതിയ നോട്ടുകള്‍ക്ക്.

പ്രചാരത്തില്‍ കൂടുതലുള്ള നോട്ടാണ് നൂറ് രൂപയുടേത്. സാധാരണക്കാര്‍ കൂടുതലായി ഉപയോഗിക്കുന്നതും ഇത് തന്നെ. നിലവിലുള്ള നൂറ് രൂപ ക്രമേണ വിപണിയില്‍ നിന്ന് മറയും. പുതിയ നൂറ് രൂപാ നോട്ടുകള്‍ സപ്തംബറിലാണ് വിപണയില്‍ എത്തുക.

66 മിമീ വീതിയും 142 മി മീ നീളവുമുള്ളതായിരിക്കും പുതിയ നോട്ട്. ഇതിറങ്ങിയാലും പഴയ നൂറ് രൂപാ നോട്ടുകള്‍ ഉപയോഗിക്കാമെന്ന് റിസര്‍വ് ബാങ്ക് അറിയിച്ചു. മധ്യപ്രദേശിലെ ദേവാസിലുള്ള പ്രസിലാണ് പുതിയ നൂറ് രൂപയുടെ അച്ചടി ആരംഭിച്ചിരിക്കുന്നത്. നിലവിലെ പത്ത് രൂപാ നോട്ടിനേക്കാള്‍ വലിപ്പമുണ്ടാകും.

English summary

RBI to issue new Rs 100 notes in lavender colour, existing series to still be valid