സാമൂഹിക ക്ഷേമപദ്ധതികള്ക്ക് ആധാര്: അവസാന തിയ്യതി 2018 മാര്ച്ച് 31 വരെ സമയം!
ദില്ലി: സര്ക്കാരിന്റെ സാമൂഹിക ക്ഷേമ പദ്ധതികള്ക്ക് ആധാര് ബന്ധിപ്പിക്കുന്നതിനുള്ള അവസാന തിയ്യതി നീട്ടി. സര്ക്കാര് ആനുകൂല്യങ്ങള്ക്ക് ആധാര് നിര്ബന്ധമാക്കുന്നതിനുള്ള തിയ്യതി 2018 മാര്ച്ച് 31 വരെയാണ് നീട്ടിയിട്ടുള്ളത്. സര്ക്കാരിന്റെ ക്ഷേമപദ്ധതികള്ക്ക് ആധാര് നിര്ബന്ധമാക്കുന്നതുമായി ബന്ധപ്പെട്ട ഹര്ജി പരിഗണിക്കുന്നതിനിടെയാണ് കേന്ദ്രസര്ക്കാര് ഇക്കാര്യം അറിയിച്ചത്. ഇതിനെല്ലാം പുറമേ വിവിധ സേവനങ്ങള്ക്ക് ആധാര് നിര്ബന്ധമാക്കിയതിനെതിരെ സമര്പ്പിക്കപ്പെട്ടിട്ടുള്ള ഹര്ജികളും ഒക്ടോബര് 30 ന് കോടതി പരിഗണിക്കും. നേരത്തെ ഡിസംബര് 31 വരെയായിരുന്നു ഇതിന് അനുവദിച്ച സമയ പരിധി.
ആധാറില്ലാത്തതിന്റെ പേരില് സര്ക്കാര് ആനുകൂല്യങ്ങള് നിഷേധിക്കില്ലെന്നും സര്ക്കാരിന് വേണ്ടി ഹാജരായ അറ്റോര്ണി ജനറല് അറിയിച്ചു. മൊബൈല് നമ്പര് ആധാറുമായി ബന്ധിപ്പിക്കുന്നത് നിര്ബന്ധമാക്കിയതിനെതിരെ സമര്പ്പിച്ച ഹര്ജികള് പരിഗണിക്കവേയായിരുന്നു സുപ്രീം കോടതി. മൊബൈല് നമ്പറുമായും ആധാര് ബന്ധിപ്പിക്കുന്നത് നിയമവിരുദ്ധമാണെന്ന വാദമാണ് ഹര്ജിക്കാരുടേത്. നിലവിലുള്ള മൊബൈല് ഉപഭോക്താക്കള്ക്ക് ഇ വേരിഫിക്കേഷന് എളുപ്പമാക്കാന് സര്ക്കാര് നീക്കം ആരംഭിച്ചിട്ടുണ്ട്.