ദില്ലി-നോയിഡ റോഡ് വീണ്ടും തുറന്നു: ഷഹീന് ബാഗിലെ ഗതാഗതക്കുരുക്കില് നിന്ന് മോചനം!!
ദില്ലി: നോയിഡയെ ദില്ലിയിലെ കാളിന്ദി കുഞ്ജുമായി ബന്ധിപ്പിക്കുന്ന പ്രധാനപ്പെട്ട റോഡ് ഉത്തര്പ്രദേശ് പൊലീസ് വെള്ളിയാഴ്ച ജനങ്ങള്ക്കായി തുറന്നു കൊടുത്തു. ഇതോടെ ഷഹീന് ബാഗിലെ പ്രതിഷേധത്തെ തുടര്ന്ന് ബുദ്ധിമുട്ടിലായ ജനങ്ങള്ക്ക് ആശ്വാസമായിരിക്കുകയാണ്. ഷഹീന് ബാഗിലെ പ്രതിഷേധത്തെ തുടര്ന്നുള്ള തിരക്ക് കുറയ്ക്കാനാണ് യുപി പൊലീസ് കാളിന്ദി കുഞ്ജില് നിന്ന് ഫരീദാബാദിലേക്കുള്ള റോഡ് ജനങ്ങള്ക്കായി വീണ്ടും തുറന്ന് കൊടുത്തതെന്ന് പൊലീസ് വൃത്തങ്ങള് അറിയിച്ചു. നോയിഡയിലെ മഹാമായ ഫ്ളൈ ഓവര് മുതല് ദില്ലി, ഫരീദാബാദ് എന്നിവിടങ്ങളിലേക്കുള്ള റോഡാണ് ഇപ്പോള് തുറന്നിരിക്കുന്നത്. പൗരത്വ ഭേദഗതി നിയമത്തിനെതിരായ പ്രതിഷേധത്തെ തുടര്ന്ന് തെക്ക് കിഴക്കന് ദില്ലിയിലെ ഷഹീന് ബാഗ്-കാളിന്ദി കുഞ്ച് റോഡ് രണ്ട് മാസമായി സമരക്കാര് തടഞ്ഞിരിക്കുകയാണ്.
ബെംഗളൂരുവില് എസ്എപി ജീവനക്കാര്ക്ക് പന്നിപ്പനി: ഇന്ത്യയിലെ ഓഫീസുകള് അടച്ചത് രണ്ടാഴ്ചത്തേക്ക്!!
ഷഹീന് ബാഗ് മുതല് കാളിന്ദി കുഞ്ച് റോഡ് വരെയുള്ള മൂന്ന് കിലോമീറ്ററോളം ദൂരമുള്ള മേഖലയില് ധാരാളം വാണിജ്യ കേന്ദ്രങ്ങളും കടകളും റെസ്റ്റോറന്റുകളുമാണുള്ളത്. അറ്റ്ലാന്റ വാട്ടര് പാര്ക്കിലാണ് റോഡ് അവസാനിക്കുന്നത്. ദില്ലിക്കും നോയിഡയ്ക്കും ഇടയിലുള്ള ധാരാളം യാത്രക്കാര് ഉപയോഗിക്കുന്ന വഴിയാണ് നോയിഡ-ഗ്രേറ്റര് നോയിഡ എക്സ്പ്രസ് വേയ്ക്ക് സമാന്തരമായുള്ള ഷഹീന് ബാഗ്-കാളിന്ദി കുഞ്ച് റോഡ്.
അതേസമയം മൂന്ന് മാസത്തോളമായി ഷഹീന് ബാഗില് സമരം നടത്തുന്ന പ്രതിഷേധക്കാരോട് സമരവേദി മാറ്റിക്കൂടേയെന്ന് സുപ്രീംകോടതി കഴിഞ്ഞ ദിവസം ചോദിച്ചിരുന്നു. സമരം ചെയ്യാന് എല്ലാവര്ക്കും അവകാശമുണ്ടെന്നും എന്നാല് റോഡ് ഗതാഗതം തടസ്സപ്പെടുത്താതെ സമരം തുടരണമെന്നും കോടതി ആവശ്യപ്പെട്ടു. കടുത്ത ഗതാഗത നിയന്ത്രണങ്ങളാണ് സമരത്തെ തുടര്ന്ന് ദില്ലി പൊലീസ് ഏര്പ്പെടുത്തിയിരിക്കുന്നത്. പലയിടങ്ങളിലും ഗതാഗതം വഴിതിരിച്ച് വിടാന് പൊലീസ് വച്ച ബാരിക്കേഡുകള് കാരണം വലിയ ഗതാഗത കുരുക്കാണ് അനുഭവപ്പെടുന്നതെന്നും റിപ്പോര്ട്ടുകള് പറയുന്നു.