കാമുകന്റെ ഭാര്യയോടുള്ള പ്രതികാരത്തിനായി കുട്ടിയെ കൊലപ്പെടുത്തി
വെല്ലൂര്: കാമുകന്റെ ഭാര്യയോടുള്ള പ്രതികാരം തീര്ക്കാനായി കുട്ടിയെ കൊലപ്പെടുത്തിയ യുവതി അറസ്റ്റിലായി. വെല്ലൂര് മുത്തുമണ്ഡപം സ്വദേശിനിയായ പി സുമതി(28)യാണ് പോലീസ് പിടിയിലായത്. കാമുകന്റെ ഭാര്യ തന്നെ പരസ്യമായി അധിക്ഷേപിച്ചതിനെ തുടര്ന്നാണ് അവരുടെ കുട്ടിയെ കൊലപ്പെടുത്തിയതെന്ന് പ്രതി പോലീസിനോട് സമ്മതിച്ചു.
വെല്ലൂരിലെ മുരളിയുടെ മൂന്നു വയസുകാരനായ ദിനേശന് ആണ് കൊല്ലപ്പെട്ടത്. കുട്ടിയെ വീട്ടിലേക്ക് വിളിച്ചുവരുത്തിയശേഷം കൊല ചെയ്യുകയാണെന്ന് ഇവര് പറഞ്ഞു. കൊല ചെയ്തശേഷം മൃതദേഹം ഒളിപ്പിച്ചു വെക്കാന് ശ്രമിച്ചെങ്കിലും പോലീസിന്റെയും നാട്ടുകാരുടെയും തിരച്ചിലിനിടയില് ഇവരുടെ വീട്ടിലെ അലമാരയില് നിന്നും കുട്ടിയുടെ മൃതദേഹം ഒളിപ്പിച്ച നിലയില് കണ്ടെടുത്തു.
മകനെ കാണാനില്ലെന്നു കാട്ടി മുരളി കഴിഞ്ഞദിവസം പോലീസില് പരാതി നല്കിയിരുന്നു. കുട്ടിക്കുവേണ്ടിയുള്ള നാട്ടുകാരുടെ തിരച്ചിലില് സുമതിയും പങ്കെടുത്തതായി പറയുന്നു. കുട്ടിയെ സുമതിയുടെ വീട്ടില് കണ്ടതായുള്ള ഒരു അയല്ക്കാരന്റെ സൂചനയെ തുടര്ന്ന് സുമതിയെ ചോദ്യം ചെയ്തപ്പോഴാണ് സത്യം പുറത്തുവന്നത്.
മുരളിയുമായി അവിഹിതബന്ധം ഉണ്ടായിരുന്ന സുമതിയെ മുരളിയുടെ ഭാര്യ നിരന്തരം വഴക്കു പറഞ്ഞിരുന്നു. ബന്ധം അവസാനിപ്പിച്ചശേഷവും പരസ്യമായി അപമാനിക്കല് തുടര്ന്നതോടെയാണ് കുട്ടിയെ കൊലപ്പെടുത്തി പ്രതികാരം തീര്ക്കാന് തീരുമാനിച്ചത്. കുട്ടിയുടെ കൈകാലുകള് ബന്ധിച്ച് ശ്വാസം മുട്ടിയാണ് കൊലപ്പെടുത്തയതെന്ന് പ്രതി പോലീസിന് മൊഴി നല്കി.