5 കോടി തൊഴിലുമായി റോസ്ഗാർ മേള: ഒരു പുതിയ തൊഴില്‍ അവസരം പോലുമില്ല; വന്‍ തട്ടിപ്പെന്ന് എഎ റഹീം എംപി

Updated: Thursday, July 27, 2023, 19:51 [IST]

ഡല്‍ഹി: കേന്ദ്ര സർക്കാറിന്റെ റോസ്ഗാർ മേള ഊതിവീർപ്പിച്ച ബലൂണെന്ന് എഎ റഹീം എംപി. റോസ്ഗാർ മേളകൾ വഴി എത്ര പുതിയ തൊഴിലവസരങ്ങൾ സൃഷ്ടിച്ചു എന്ന ചോദ്യത്തിന് ഒന്ന് പോലും സൃഷ്ടിച്ചിട്ടില്ല എന്ന് കേന്ദ്ര സർക്കാർ കുറ്റസമ്മതം നടത്തി. ലക്ഷക്കണക്കിന് ഒഴിവുകളാണ് കേന്ദ്രസർക്കാരിൻ്റെ കീഴിൽ നികത്താതെ കിടക്കുന്നത്. പോസ്റ്റ് ഓഫീസ് വഴി ഉദ്യോഗാർത്ഥികൾക്ക് സ്വാഭാവികമായി ലഭിക്കേണ്ട നിയമന ഉത്തരവുകൾ റോസ്ഗാർ മേള എന്ന വ്യാജലേബലിൽ നൽകി ജനങ്ങളെ വഞ്ചിക്കുകയായിരുന്നുവെന്നും എഎ റഹീം ഫേസ്ബുക്കില്‍ കുറിക്കുന്നു.

എഎ റഹീം എംപിയുടെ കുറിപ്പിന്റെ പൂർണ്ണ രൂപം ഇങ്ങനെ

5 കോടി തൊഴിലവസരങ്ങൾ സൃഷ്ടിക്കുമെന്ന് പൊങ്ങച്ചം പറഞ്ഞ നരേന്ദ്രമോദിയുടെ റോസ്ഗാർ മേളകൾ ഊതിവീർപ്പിച്ച ബലൂൺ മാത്രമായിരുന്നെന്ന് രാജ്യസഭയിൽ റോസ്ഗാർ മേളകളെ സംബന്ധിച്ച് പ്രധാനമന്ത്രിയോട് ഉന്നയിച്ച ചോദ്യത്തിന് മറുപടി നൽകി.

റോസ്ഗാർ മേളകൾ വഴി എത്ര പുതിയ തൊഴിലവസരങ്ങൾ സൃഷ്ടിച്ചു എന്ന ചോദ്യത്തിന് ഒന്ന് പോലും സൃഷ്ടിച്ചിട്ടില്ല എന്ന് കേന്ദ്ര സർക്കാർ കുറ്റസമ്മതം നടത്തി. കൂടാതെ, മന്ത്രാലയങ്ങൾക്ക് കീഴിലും, വിദ്യാഭ്യാസ- ആരോഗ്യ- ബാങ്കിംഗ് ഉൾപ്പെടെയുള്ള കേന്ദ്ര പൊതുമേഖലാ സ്ഥാപനങ്ങൾക്കും കീഴിലുള്ള സ്വാഭാവിക ഒഴിവുകൾ മാത്രമായിരുന്നു റോസ്ഗാർ മേളകൾ വഴി നികത്തിയത് എന്നും കേന്ദ്ര സർക്കാർ വെളിപ്പെടുത്തി. റിക്രൂട്ട്മെൻ്റുകൾ നടത്തിയത് UPSC, SSC, Railway Recruitment Board തുടങ്ങിയ റിക്രൂട്ടിംഗ് ഏജൻസികൾ ആണെന്നും മറുപടിയിൽ സൂചിപ്പിച്ചു. റോസ്ഗാർ മേളകൾ വഴി എത്ര കരാർ തൊഴിലാളികളെയാണ് നിയമിച്ചത് എന്ന ചോദ്യത്തിൽ നിന്നും ഉത്തരം നൽകാതെ സർക്കാർ ഒഴിഞ്ഞു മാറി.

ലക്ഷക്കണക്കിന് ഒഴിവുകളാണ് കേന്ദ്രസർക്കാരിൻ്റെ കീഴിൽ നികത്താതെ കിടക്കുന്നത്. പോസ്റ്റ് ഓഫീസ് വഴി ഉദ്യോഗാർത്ഥികൾക്ക് സ്വാഭാവികമായി ലഭിക്കേണ്ട നിയമന ഉത്തരവുകൾ റോസ്ഗാർ മേള എന്ന വ്യാജലേബലിൽ നൽകി ജനങ്ങളെ വഞ്ചിക്കുന്ന സമീപനമാണ് നരേന്ദ്രമോദി സ്വീകരിച്ചു വരുന്നത്. തരം താഴ്ന്ന ഈ പ്രചരണ തന്ത്രത്തിന് മാത്രമായി പൊതു ഖജനാവിൽ നിന്നുള്ള കോടിക്കണക്കിന് രൂപ ചെലവഴിക്കുന്നതും ജനങ്ങളോടാകെയുള്ള വഞ്ചനയാണ്.

രാജ്യത്തെ യുവതി - യുവാക്കളോട് സർക്കാർ മാപ്പ് പറയണം. സർക്കാരും ഒരു വിഭാഗം മാധ്യമങ്ങളും കൂടി ഊതി വീർപ്പിച്ച ബലൂൺ ഇന്നത്തെ ഉത്തരത്തിലൂടെ അവർക്ക് തന്നെ പൊട്ടിക്കേണ്ടി വന്നു. തൊഴിലില്ലായ്മ രൂക്ഷമായിരിക്കുന്ന ഈ പശ്ചാത്തലത്തിൽ ഇത്തരത്തിലുള്ള ഗിമ്മിക്കുകളല്ല രാജ്യത്തിനാവശ്യം. പുതിയ തൊഴിലവസരങ്ങൾ സൃഷ്ടിക്കുകയാണ് വേണ്ടത്.