ട്രെയിനിന് പിറകെ ഓടി കുഞ്ഞിന് പാൽ എത്തിച്ചു, വീഡിയോ വൈറൽ, ഹീറോ ആയി ജവാൻ
ദില്ലി: അതീവ ദുരിതങ്ങളുടേതാണ് ഈ കൊവിഡ് ലോക്ക്ഡൗണ് കാലമെങ്കിലും അതിനിടെയിലും ചിലര് നന്മയുടെ വെളിച്ചം വിതറുന്നുണ്ട്. ഞൊടിയിടയ്ക്കുളളില് രാജ്യത്തിന്റെ തന്നെ ഹീറോകളായി മാറുന്നുണ്ട്. ആര്പിഎഫ് ജവാനായ ഇന്ദര് സിംഗ് യാദവിനെയാണ് രാജ്യം ഇന്ന് അഭിനന്ദിക്കുന്നത്. ശ്രമിക് ട്രെയിനില് നാട്ടിലേക്ക് പോവുകയായിരുന്ന യുവതിയുടെ പിഞ്ചുകുഞ്ഞിന് സാഹസികമായി പാല് എത്തിച്ച് നല്കിയാണ് ഇന്ദര് സിംഗ് യാദവ് കയ്യടി നേടുന്നത്.
ഷാരിഫ് ഹാഷ്മി എന്ന യുവതിയുടെ നാല് മാസം മാത്രം പ്രായമുളള കുഞ്ഞിനാണ് ആര്പിഎഫ് ജവാന് രക്ഷകനായത്. ബെല്ഗാമില് നിന്ന് ഗൊരഖ്പൂരിലേക്ക് പോവുകയായിരുന്ന ശ്രമിക് ട്രെയിനിലെ യാത്രക്കാരി ആയിരുന്നു ഷാരിഫ് ഹാഷ്മി. ഒപ്പം നാല് മാസം മാത്രം പ്രായമുളള കുഞ്ഞുമുണ്ട്.
ഷാരിഫിന്റെ പക്കല് കുഞ്ഞിന് നല്കാനുളള പാലുണ്ടായിരുന്നില്ല. യാത്ര പുറപ്പെട്ട ബെല്ഗാം മുതല് പാലിന് വേണ്ടി യുവതി ശ്രമിച്ചിരുന്നുവെങ്കിലും കിട്ടിയില്ല. ഒടുവില് ഭോപ്പാല് സ്റ്റേഷനില് എത്തിയപ്പോള് കരയുന്ന കുഞ്ഞിന് എവിടെ നിന്നെങ്കിലും കുറച്ച് പാല് സംഘടിപ്പിക്കാനാകുമോ എന്ന ശ്രമത്തിലായിരുന്നു ഷാരിഫ്. എന്നാല് യാത്രക്കാര് ആരും ട്രെയിനിന് പുറത്തേക്ക് ഇറങ്ങരുത് എന്നായിരുന്നു സ്റ്റേഷനിലെ അറിയിപ്പ്.
എന്ത് ചെയ്യണം എന്നറിയാതെ വിഷമിച്ച് നിന്ന ഷാരിഫ് മുന്നില് കണ്ട ആര്പിഎഫ് ജവാനോട് കാര്യം പറഞ്ഞു. ഷാരിഫിന്റെ വിഷമം മനസ്സിലാക്കിയ ഇന്ദര് സിംഗ് നേരെ പാല് ബൂത്തിലേക്ക് ഓടി. റെയില്വേ സ്റ്റേഷന് പുറത്തായിരുന്നു പാല് ബൂത്ത്. ഒരു കുപ്പിയില് പാലുമായി ഇന്ദര് സിംഗ് പ്ലാറ്റ്ഫോമിലേക്ക് എത്തുമ്പോഴേക്കും ട്രെയിന് ചലിച്ച് തുടങ്ങിയിരുന്നു. എന്നാല് ഓടിയെത്തി യാദവ് പാല്ക്കുപ്പി ഷാരിഫിന് കൈമാറി. കയ്യില് പാല്ക്കുപ്പിയും ഒരു കയ്യില് റിവോള്വറും പിടിച്ച് ട്രെയിനിന് നേര്ക്ക് ഓടുന്ന ജവാന്റെ ദൃശ്യം സ്റ്റേഷനിലെ സിസിടിവിയില് പതിഞ്ഞിരുന്നു.
ഈ വീഡിയോ സോഷ്യല് മീഡിയയില് വൈറലായിരിക്കുകയാണ്. ജവാന് നന്ദി പറഞ്ഞുകൊണ്ട് ട്രെയിനില് നിന്ന് ഷാരിഫും വീഡിയോ പോസ്റ്റ് ചെയ്തിട്ടുണ്ട്. ജവാനെ അഭിനന്ദിച്ച് റെയില്വേ മന്ത്രി പീയുഷ് ഗോയല് അടക്കമുളളവര് രംഗത്ത് വന്നിട്ടുണ്ട്. വീഡിയോയും മന്ത്രി ട്വിറ്ററില് പങ്കുവെച്ചിട്ടുണ്ട്.
കോൺഗ്രസിനെ തകർത്ത് പഞ്ചാബ് പിടിക്കാൻ കെജ്രിവാൾ! സിദ്ദു കോൺഗ്രസ് വിട്ടേക്കും! പുതിയ നീക്കം!
ആന ചെരിഞ്ഞതിന് പഴി രാഹുൽ ഗാന്ധിക്കും! ബിജെപിക്കെതിരെ ആഞ്ഞടിച്ച് കോൺഗ്രസ്! കല്ല് വെച്ച നുണ!