രോഹിത് വെമുലയെ ആര്‍എസ്എസ് കൊല്ലാന്‍ നോക്കിയെന്ന് രാഹുല്‍ഗാന്ധി

ദില്ലി: ആത്മഹത്യ ചെയ്ത രോഹിത് വെമുലയെ ആര്‍എസ്എസ് കൊലപ്പെടുത്താന്‍ ശ്രമിച്ചിരുന്നുവെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. രോഹിത് വെമുലയെ കൊല്ലുമെന്ന് ആര്‍എസ്എസ് ഭീഷണിപ്പെടുത്തിയിരുന്നതായി രാഹുല്‍ പറയുന്നു. ആര്‍എസ്എസിന്റെ വിളയാട്ടമാണ് രാജ്യത്ത് നടക്കുന്നതെന്നും രാഹുല്‍ വ്യക്തമാക്കുന്നു.

രാജ്യത്തിലെ നിലവിലെ അവസ്ഥയില്‍ തനിക്ക് വേദനയുണ്ടെന്നും രാഹുല്‍ പറഞ്ഞു. അനീതിക്കെതിരെ ശബ്ദമുയര്‍ത്തിയപ്പോള്‍ രോഹിത്തിന്റെ വാക്കുകളെ അടിച്ചമര്‍ത്തപ്പെടുകയായിരുന്നുവെന്നും അദ്ദേഹം പറഞ്ഞു. രോഹിത്തിന് നീതി ലഭിക്കണമെന്നാവശ്യപ്പെട്ട് വിദ്യാര്‍ത്ഥികള്‍ ജന്തര്‍ മന്തറില്‍ സംഘടിപ്പിച്ച പ്രതിഷേധ പരിപാടിയില്‍ പങ്കെടുത്തു സംസാരിക്കുകയായിരുന്നു രാഹുല്‍.

ഇന്ത്യയുടെ ഭാവിയെക്കുറിച്ചാണ് രോഹിത് സംസാരിച്ചിരുന്നത്. എന്നാല്‍, ആര്‍എസ്എസ് രാജ്യത്ത് പ്രശ്‌നങ്ങള്‍ ഉണ്ടാക്കാനാണ് ശ്രമിച്ചത്. അവര്‍ പറയുന്ന പോലെ കാര്യങ്ങള്‍ നടപ്പാക്കാനാണ് ആര്‍എസ്എസ് ശ്രമിച്ചത്. അതിനു തയ്യാറായില്ലെങ്കില്‍ രോഹിത്തിനെ കൊല്ലുമെന്നു ഭീഷണിപ്പെടുത്തി.

രാജ്യത്തിലെ എല്ലാ സര്‍വ്വകലാശാലകളിലും തങ്ങളുടെ പ്രത്യയശാസ്ത്രം അടിച്ചേല്‍പ്പിക്കാനാണ് ബിജെപിയും ആര്‍എസ്എസും ശ്രമിക്കുന്നതെന്നും രാഹുല്‍ വിമര്‍ശിച്ചു. രാജ്യത്തിന്റെ നല്ല ഭാവിക്കുവേണ്ടി പോരാടിയ രോഹിത് ഈ ലോകത്തില്‍ നിന്നും തന്നെ വിടവാങ്ങി. യുവാക്കളുടെ ശബ്ദത്തെ അടിച്ചമര്‍ത്താനാണ് ആര്‍എസ്എസ് ശ്രമിക്കുന്നതെന്നും രാഹുല്‍ പറയുന്നു.

English summary

Congress vice president Rahul Gandhi alleged that Rashtriya Swayamsevak Sangh (RSS) had threatened to kill PhD scholar Rohith Vemula.