ശമ്പളത്തില് വലിയ മാറ്റം വരും; ഈ മൂന്ന് ഫിറ്റ്മെന്റ് ഫാക്ടര് പരിഗണിച്ചാലുള്ള വര്ധനവ് അറിയാം
ന്യൂഡല്ഹി: എട്ടാം ശമ്പള കമ്മീഷന്റെ റിപ്പോര്ട്ട് കാത്തിരിക്കുകയാണ് കേന്ദ്ര സര്ക്കാര് ജീവനക്കാര്. കമ്മീഷന് പഠനം തുടങ്ങിയിട്ട് മാസങ്ങളായി. ജീവനക്കാരുടെ സംഘനടകളില് നിന്ന് പ്രതികരണം തേടുകയും ചെയ്തു. വിപണി സാഹചര്യവും രാജ്യത്തിന്റെ സാമ്പത്തിക അവസ്ഥയുമെല്ലാം പരിഗണിച്ചാകും റിപ്പോര്ട്ട് സമര്പ്പിക്കുക.
ഏഴാം ശമ്പള കമ്മീഷന് റിപ്പോര്ട്ട് സമര്പ്പിച്ച വേളയില് ഏറ്റവും സാധാരണ തസ്തികയില് ജോലി ചെയ്യുന്ന വ്യക്തിക്ക് 11000 രൂപയാണ് വര്ധിച്ചത്. എന്നാല് ഇത്തവണ ഇരട്ടി വര്ധനവാണ് പ്രതീക്ഷിക്കുന്നത്. കുടുംബ യൂണിറ്റ് പരിഗണിക്കുന്നതില് മാറ്റം വേണം എന്നതുള്പ്പെടെയുള്ള ആവശ്യങ്ങള് സര്ക്കാര് ജീവനക്കാരുടെ സംഘടനകള് ഉന്നയിച്ചിട്ടുണ്ട്.
50 ലക്ഷം കേന്ദ്രസര്ക്കാര് ജീവനക്കാരെയും 65 ലക്ഷം പെന്ഷന്കാരെയും ബാധിക്കുന്നതാണ് എട്ടാം ശമ്പള കമ്മീഷന്റെ റിപ്പോര്ട്ട്. ഇവരുടെ ശമ്പളത്തിലും പെന്ഷനിലും കാര്യമായ മാറ്റമാണ് വരാന് പോകുന്നത്. 2016 മുതല് ആരംഭിച്ച ഏഴാം ശമ്പള കമ്മീഷന് പ്രകാരമുള്ള ശമ്പള പരിഷ്കരണം 2026 ഡിസംബറില് അവസാനിച്ചു. ഇനി ശമ്പള പരിഷ്കരണം നടപ്പാക്കുക എട്ടാം ശമ്പള കമ്മീഷന്റെ റിപ്പോര്ട്ട് പ്രകാരമായിരിക്കും.
രാജ്യത്തെ വിപണി സാഹചര്യം പരിശോധിച്ച് ശമ്പള കമ്മീഷന് ഫിറ്റ്മെന്റ് ഫാക്ടര് നിശ്ചയിക്കും. ഇതാണ് എത്രത്തോളം ശമ്പളം വര്ധിക്കും എന്നതില് നിര്ണായകം. ഏഴാം ശമ്പള കമ്മീഷന് നിശ്ചച്ച ഫിറ്റ്മെന്റ് ഫാക്ടര് 2.57 ആയിരുന്നു. പത്ത് വര്ഷം പിന്നിട്ട സാഹചര്യത്തില് ഇതിനേക്കാള് ഉയര്ന്ന ഫിറ്റ്മെന്റ് ഫാക്ടര് ആയിരിക്കും ഇത്തവണ നിശ്ചയിക്കുക എന്നാണ് പ്രതീക്ഷിക്കുന്നത്.
3 ഫിറ്റ്മെന്റ് ഫാക്ടറിലെ ശമ്പള മാറ്റം
പണപ്പെരുപ്പം, ജീവിത ചെലവ്, നിലവിലെ അടിസ്ഥാന ശമ്പളം എന്നിവയെല്ലാം പരിഗണിച്ചാണ് ശമ്പള കമ്മീഷന് ഫിറ്റ്മെന്റ് ഫാക്ടര് നിശ്ചയിക്കുക. കേന്ദ്ര സര്ക്കാരിന്റെ ലെവല് ഒന്ന് ജീവനക്കാരനായി പ്രവേശിക്കുന്ന വ്യക്തിക്ക് നിലവില് ലഭിക്കുന്ന അടിസ്ഥാന ശമ്പളം 18000 രൂപയാണ്. മൂന്ന് ഫിറ്റ്മെന്റ് ഫാക്ടറില് ഇതില് എത്ര രൂപയുടെ മാറ്റം വരുമെന്ന് അറിയാം.
ഫിറ്റ്മെന്റ് ഫാക്ടര് 2.57 ആണെങ്കില് അടിസ്ഥാന ശമ്പളം 46260 രൂപയായി ഉയരും. എന്നാല് ഫിറ്റ്മെന്റ് ഫാക്ടര് 3.0 ആണെങ്കില് അടിസ്ഥാന ശമ്പളം 54000 ആയി ഉയരും. ഫിറ്റ്മെന്റ് ഫാക്ടര് 3.25 ആണെങ്കില് അടിസ്ഥാന ശമ്പളം 58500 രൂപയാകും. ഇതില് ഏതെങ്കിലും ഒരു ഫിറ്റ്മെന്റ് ഫാക്ടര് നിശ്ചയിക്കാനാണ് സാധ്യത. ജീവനക്കാരന്റെ ലെവല് ഉയരുന്നതിന് അനുസരിച്ച് അടിസ്ഥാന ശമ്പളത്തില് വലിയ മാറ്റമുണ്ടാകും.
18 ലെവല് ജീവനക്കാരാണുള്ളത്. വിവിധ വകുപ്പുകളിലെ സെക്രട്ടറിമാര് ഉള്പ്പെടെയാണ് ലെവല് 18ല് വരുന്നത്. അടിസ്ഥാന ശമ്പളത്തിന് പുറമെ എച്ച്ആര്എ, മറ്റു അലവന്സുകള് എന്നിവ ചേരുമ്പോള് കൈയ്യില് കിട്ടുന്ന തുകയില് വീണ്ടും വര്ധനവുണ്ടാകും. അതേസമയം, ഡിഎ ഓരോ വര്ഷവും രണ്ട് തവണയായി വര്ധിപ്പിക്കുകയാണ് ചെയ്യുക. എട്ടാം ശമ്പള കമ്മീഷന് അടുത്ത വര്ഷം റിപ്പോര്ട്ട് സമര്പ്പിക്കുമെന്നാണ് കരുതുന്നത്.
Click it and Unblock the Notifications
Sign in with Google