യാക്കൂബ് മേമനെ അനുകൂലിച്ചത് സല്മാന് വിവരമില്ലാഞ്ഞിട്ടെന്ന് പിതാവ് സലിം
മുംബൈ: മുംബൈ സ്ഫോടന പരമ്പര കേസിലെ പ്രതി യാക്കൂബ് മേമനെ തൂക്കിലേറ്റരുതെന്ന സല്മാന് ഖാന്റെ ട്വിറ്റര് പോസ്റ്റിനെ തള്ളി തിരക്കഥാക്കൃത്തും അദ്ദേഹത്തിന്റെ പിതാവുമായ സലിം ഖാന് രംഗത്ത്. ട്വീറ്റുകള് വെറും അര്ത്ഥശൂന്യമാണെന്ന് സലിം ഖാന് പറഞ്ഞു.
യാക്കൂബിന്റെ വധ ശിക്ഷയുമായി ബന്ധപ്പെട്ട് സല്മാന് എഴുതിയത് വെറും വിഡ്ഢിത്തരം മാത്രമാണ്. സംഭവത്തിന്റെ യാഥാര്ത്ഥ ഗൗരവം എന്താണെന്ന് സല്മാന് അറിവില്ലാത്തതാണ്. അതുകൊണ്ട് പ്രസ്താവന ആരും കാര്യമായി എടുക്കേണ്ടതില്ലെന്നും സലിം പറഞ്ഞു.
1993ലെ സ്ഫോടനവുമായി ബന്ധപ്പെട്ട് യാക്കൂബ് മേമനെയല്ല മറിച്ച് അദ്ദേഹത്തിന്റെ സഹോദരന് ടൈഗര് മേമനെയാണ് തൂക്കിലേറ്റണ്ടതെന്ന് ബോളിവുഡ് താരം സല്മാന് ഖാന് ട്വിറ്ററില് കുറിച്ചത്. കേസില് നിരപരാധിയായ ഒരാളെ തൂക്കിലേറ്റുന്നത് മനുഷ്യത്വരഹിതമാണെന്നും സല്മാന് അഭിപ്രായപ്പെട്ടു.
ടൈഗറിനെ വിട്ടുനല്കാന് പാകിസ്ഥാന് തയ്യാറാകണമെന്നും സല്മാന് ആവശ്യപ്പെട്ടിരുന്നു. സല്മാന്റെ ഇത്തരം പരാമര്ശത്തിനെതിരെയാണ് പിതാവ് സലിം ഖാന് രംഗത്തുവന്നത്.