സല്മാന് ഖാനെ കാണാന് ബോളിവുഡ്; ആമിറും വീട്ടിലെത്തി
മുംബൈ: വാഹനാപകടക്കേസില് അഞ്ചുവര്ഷം തടവുശിക്ഷ ലഭിച്ച സല്മാന് ഖാനെ കാണാന് ബോളിവുഡിലെ പ്രമുഖ താരനിര സല്ലുവിന്റെ വീട്ടിലെത്തി. ശിക്ഷയ്ക്കു പിന്നാലെ സല്മാന് ഖാന് രണ്ടു ദിവസത്തെ ഇടക്കാല ജാമ്യം ലഭിച്ചിരുന്നു. ഇതേ തുടര്ന്ന് വീട്ടില് കഴിയുന്ന സല്ലുവിനെ ആശ്വസിപ്പിക്കാനാണ് പ്രമുഖരെത്തിയത്.
വിധിക്ക് മുന്പ് കിങ് ഖാന് സല്മാന്റെ വീട്ടിലെത്തിയിരുന്നു. വിധി വന്നതിനുശേഷം ഖാന് ത്രയത്തിലെ മൂന്നാമന് ആമിര് ഖാനും സല്ലുവിനെ കാണാനും ആശ്വസിപ്പിക്കാനുമെത്തി. മൂവര് സംഘം കണ്ടുമുട്ടുന്നതും സൗഹൃദത്തിലാകുന്നതും അപൂര്വമായ സന്ദര്ഭങ്ങളിലായതിനാല് ബോളിവുഡ് മാധ്യമങ്ങളെല്ലാം സ്ഥലത്തെത്തിയിരുന്നു.
സല്മാന്റെ സഹോദരന് അര്ബാസ്, സുനില് ഷെട്ടി, സോനു സുഡ്, സോനാക്ഷി സിന്ഹ, പ്രീതി സിന്ഹ, റാണി മുഖര്ജി, ബിപാഷ ബസു എന്നിവരെല്ലാം സല്മാന് ഖാന്റെ വീട്ടിലെത്തി. മേല്ക്കോടതി വിധി അനുകൂലമാകുമെന്നും ഭയക്കേണ്ടതില്ലെന്നും സല്മാന് ഖാനെ ആശ്വസിപ്പിച്ചാണ് താരങ്ങളെല്ലാം മടങ്ങിയത്.
സല്മാന് ഖാന് ജയിലിലാകുകയാണെങ്കില് അഞ്ഞൂറു കോടിയോളം രൂപയുടെ നഷ്ടമാകും ബോളിവുഡിന് സംഭവിക്കുക. സല്മാന് പുറമെ താരങ്ങള്ക്കും കോടികളുടെ നഷ്ടമുണ്ടായേക്കും. ഇതാണ് താരങ്ങളെയും സിനിമാ പ്രവര്ത്തകരെയും വിഷമിപ്പിക്കുന്ന പ്രധാനകാര്യം. നിരവധി സിനിമകളും പ്രൊജക്റ്റകളും മുടങ്ങുന്നതിന് പുറമേ, ബോളിവുഡിലെ നൂറുകോടി ക്ലബ്ബിലെ സ്ഥിരം സാന്നിദ്ധ്യമാണ് ജയിലിലാകുന്നതെന്നതാണ് ബോളിവുഡിന്റെ മറ്റൊരു ആശങ്ക.