രജനീകാന്ത് വെറും നടന് മാത്രമാണ്; നേതാവെന്ന് വിളിക്കുന്നവരെ കൊന്നുകളയണമെന്ന് സംവിധായകന് സീമാന്
ചെന്നൈ: നടന് രജനീകാന്തിനെ തലൈവർ (നേതാവ്) എന്നു വിളിക്കുന്നവരെ കൊന്നുകളയണമെന്ന് സംവിധായകന് സീമാന്. സിനിമയില് അഭിനയിച്ചു എന്നതുകൊണ്ടുമാത്രം ഒരാള് നേതാവാകില്ല. ജനങ്ങള്ക്കുവേണ്ടി ത്യാഗം ചെയ്യുന്നവരാണ് നേതാക്കള്.
സിനിമിയില് അഭിനയിക്കുന്നവരെ നടന്മാരെന്നു വിളിച്ചാല് മതി. എന്നാല് ചിലര് രജനീകാന്തിനെ നേതാവെന്നാണ് വിളിക്കുന്നത്. അവരെ ഒരിക്കലും പറഞ്ഞു മനസ്സിലാക്കാന് സാധിക്കില്ലെന്നും കൊന്നുകളയുകയാണുവേണ്ടതെന്നും സീമാന് പറഞ്ഞു.
സിനിമാകൊട്ടകയില് മാത്രമാണ് നടന്മാര് നേതാക്കളാകുന്നത്. രജനീകാന്തിനെപ്പോലെയുള്ളവരെ നേതാവെന്ന് വിളിച്ചാല് കാമരാജിനെപ്പോലെയുള്ളവരെ സാമൂഹികവിരുദ്ധരെന്ന് വിളിക്കുമോയെന്നും നാം തമിഴര് കക്ഷി നേതാവുകൂടിയായ സീമാന് അഭിപ്രായപ്പെട്ടു.
സുരേഷ് കാമാച്ചി സംവിധാനം ചെയ്യുന്ന ചിത്രത്തിന്റെ ടീസര് പുറത്തിറക്കുന്ന ചടങ്ങില് സംസാരിക്കുകയായിരുന്നു സീമാന്. ടെലിവിഷനില് പോലും പലരും തലൈവര് എന്നാണ് രജനിയെ വിശേഷിപ്പിക്കുന്നത്. അതെന്തുകൊണ്ടാണെന്ന് മനസ്സിലാകുന്നില്ല. തമിഴനല്ലെന്ന് ചൂണ്ടിക്കാട്ടി രജനീകാന്തിന്റെ രാഷ്ട്രീയ പ്രവേശനത്തെ എതിര്ത്തുവരുന്ന വ്യക്തിയാണ് സീമാന്.