ഷാരൂഖ് ഖാനെ മുംബൈ പോലീസ് അറസ്റ്റ് ചെയ്തു

By Anwar Sadath

Updated: Tuesday, November 3, 2015, 8:59 [IST]

മുംബൈ: അടുത്തിടെ നടന്ന ഒരു മോഷണവുമായി ബന്ധപ്പെട്ട് ഷാരൂഖ് ഖാനെ മുംബൈ പോലീസ് അറസ്റ്റ് ചെയ്തു. ഞെട്ടേണ്ട, സിനിമാ നടന്‍ ഷാരൂഖ് ഖാന്‍ അല്ല. പതിനെട്ടുവയസുമാത്രം പ്രായമുള്ള ഒരു യുവ കള്ളനാണ് ഷാരൂഖ് ഖാന്‍. ഹിതേഷ് ധുരുപ് എന്ന ഇരുപത്തിയാറുകാരന്റെ മൊബൈല്‍ ഫോണ്‍ മോഷ്ടിച്ചതിനാണ് അറസ്റ്റ്.

മല്‍വാനിയില്‍ നിന്നും മലാദിലേക്ക് ബൈക്കില്‍ യാത്ര ചെയ്യുകയായിരുന്ന ഹിതേഷിനെ തടഞ്ഞുനിര്‍ത്തി ഭീഷണിപ്പെടുത്തിയശേഷം മൊബൈലുമായി ഷാരൂഖ് ഖാന്‍ കടന്നു കളയുകയായിരുന്നെന്ന് പോലീസ് പറഞ്ഞു. ഹിതേഷ് ഉടന്‍ പോലീസില്‍ പരാതി നല്‍കുകയും ചെയ്തു. സൈബര്‍ പോലീസിന്റെ സഹായത്തോടെ പോലീസ് നടത്തി അന്വേഷണത്തിനൊടുവിലാണ് കള്ളന്‍ പിടിയിലായത്.

മോഷണം സിനിമാസ്‌റ്റൈലില്‍ ആണെങ്കിലും സിനിമയിലെ യഥാര്‍ഥ നായകനെപ്പോലെ പോലീസിനെ വെട്ടിച്ച് രക്ഷപ്പെടാന്‍ കള്ളന് സാധിച്ചില്ല. നാട്ടുകാരുടെ സഹായത്തോടെ കള്ളനെ പോലീസ് കൈയ്യോടെ പിടികൂടുകയും ചെയ്തു. പ്രദേശത്ത് അടുത്തിടെ നടന്ന പിടിച്ചുപറിക്കേസുകളില്‍ ഷാരൂഖ് ഖാന് പങ്കുള്ളതായി പോലീസ് സംശയിക്കുന്നുണ്ട്.

യാത്രക്കാരെ തടഞ്ഞുനിര്‍ത്തി മോഷണം നടത്തുന്നത് മുംബൈയിലെ ചിലയിടങ്ങളില്‍ പതിവായിട്ടുണ്ട്. ഇതേ തുടര്‍ന്ന് പോലീസ് പട്രോളിങ് വര്‍ധിപ്പിച്ചെങ്കിലും മോഷ്ടാക്കളെ അതൊന്നും ബാധിച്ചമട്ടില്ല. പോലീസും കള്ളന്‍മാരും തമ്മിലുള്ള ഒളിച്ചുകളിയാണ് ഇതെന്നും യാത്രക്കാര്‍ ആരോപിക്കുന്നു.