മൊല്ലാക്ക താടി വടിച്ചില്ലെങ്കില്‍ മരിച്ചുകളയുമെന്ന് ഭാര്യ.. ഭാര്യ ശരിയല്ലെന്ന് മൊല്ലാക്ക!

മീററ്റ്: താന്‍ താടി വടിച്ചില്ലെങ്കില്‍ ആത്മഹത്യ ചെയ്യുമെന്ന് ഭാര്യ ഭീഷണിപ്പെടുത്തുന്നതായി മുസ്ലിം പുരോഹിതന്റെ പരാതി. ഉത്തര്‍ പ്രദേശിലെ മീററ്റ് സ്വദേശിയായ അര്‍ഷാദ് ബഹറുദ്ദീന്‍ എന്ന 36കാരനാണ് വിചിത്രമായ ഈ പരാതിയുമായി രംഗത്ത് വന്നിരിക്കുന്നത്. ഇത് മാത്രമല്ല, സ്മാര്‍ട്ട് ഫോണിലൂടെ ഭാര്യ അന്യപുരുഷന്മാരുമായി സംസാരിക്കുന്നതായും ഇയാള്‍ക്ക് പരാതിയുണ്ട്.

ജില്ലാ മജിസ്‌ട്രേറ്റിന് മുന്‍പാകെയാണ് അര്‍ഷാദ് ബഹറുദ്ദീന്‍ പരാതിയുമായി എത്തിയത്. ഭാര്യയ്ക്ക് കൗണ്‍സലിങ് വേണമെന്നാണ് ഇയാളുടെ ആവശ്യം. അര്‍ഷാദ് ബഹറുദ്ദീന്‍ താടി വടിച്ചില്ലെങ്കില്‍ ആത്മഹത്യ ചെയ്യുമെന്ന് ഭാര്യ ഇയാളോട് പറഞ്ഞത്രെ. എന്തെങ്കിലും കാരണവശാല്‍ ഭാര്യ പറഞ്ഞത് പോലെ പ്രവര്‍ത്തിച്ചാല്‍ താന്‍ സമാധാനം പറയേണ്ടി വരും എന്നതാണ് അര്‍ഷാദ് ബഹറുദ്ദീന്റെ പേടി.

2001 ലാണ് ഇയാള്‍ വിവാഹിതനായത്. മോസ്‌കില്‍ പ്രാര്‍ഥന നയിക്കുന്നത് താനാണ് എന്നാണ് ഇയാള്‍ ജില്ലാ മജിസ്‌ട്രേറ്റ് പങ്കജ് യാദവിന് മുന്‍പാകെ സമര്‍പ്പിച്ച പരാതിയില്‍ പറയുന്നത്. താനൊരു യഥാര്‍ഥ മുസ്ലിമാണ്. സല്‍മാന്‍ ഖാനെയും ഷാരൂഖ് ഖാനെയും പോലെ ക്ലീന്‍ ഷേവ് ചെയ്യണം എന്നാണത്രെ ഇയാളുടെ ഭാര്യയുടെ ആവശ്യം. ഹാപുര്‍ ജില്ലയിലെ പില്‍ഖുവ സ്വദേശിനിയാണ് ഇയാളുടെ ഭാര്യ.

മറ്റുള്ള ആളുകളെ പോലെ തനിക്ക് താടി വടിക്കാന്‍ കഴിയില്ല എന്ന് ഭാര്യയെ പറഞ്ഞ് മനസിലാക്കിക്കൊടുക്കാന്‍ ഒരുപാട് ശ്രമിച്ചു എന്നാണ് അര്‍ഷാദ് ബഹറുദ്ദീന്‍ പറയുന്നത്. എന്നാല്‍ ഭാര്യ ഇതൊന്നും ചെവിക്കൊള്ളാന്‍ തയ്യാറാകുന്നില്ല. ഇവര്‍ക്ക് നാല് മക്കളുണ്ട്. മക്കള്‍ക്ക് വിഷം കൊടുത്ത് താനും ആത്മഹത്യ ചെയ്യുമെന്ന് പറഞ്ഞാണത്രെ അര്‍ഷാദ് ബഹറുദ്ദീനെ ഇവര്‍ ഭീഷണിപ്പെടുത്തുന്നത്.

English summary

Shave or I will kill myself: Wife thretens Islamic cleric in Uttar Pradesh.