ഷീന ബോറയുടെ രാജിക്കത്ത് അയച്ചത് സഹോദരന്; കൊലപാതകത്തില് ദുരൂഹത ഏറുന്നു
മുംബൈ: വിവാദമായ ഷീന ബോറ കൊലക്കേസില് ഓരോ ദിവസം കഴിയുന്തോറും ദുരൂഹത ഏറിവരുന്നു. സഹോദരി ഷീനയുടെ കൊലപാതകവിവരം ഞെട്ടിച്ചെന്ന് കാട്ടി മാധ്യമങ്ങള്ക്കു മുന്നിലെത്തിയ ഇന്ദ്രാണി മുഖര്ജിയുടെ മകന് മിഖായേലിന് കൊലപാതകത്തെ കുറിച്ച് മുന്പ് തന്നെ സൂചന ലഭിച്ചിരുന്നതായി ചില മാധ്യമങ്ങള് റിപ്പോര്ട്ട് ചെയ്തു.
ഇന്ദ്രാണി മുഖര്ജി വന് തുക പ്രതിഫലം വാഗ്ദാനം ചെയ്ത് മിഖായേലിനെ തനിക്ക് അനുകൂലമായി നിര്ത്തുകയായിരുന്നു ഇതുവരെയെന്ന് ഇവരുടെ ഒരു ബന്ധുവും പറയുന്നത്. ഷീന ജോലി ചെയ്തിരുന്ന മെട്രോ വണ് പ്രൈവറ്റ് ലിമിറ്റഡ് കമ്പനിയിലേക്ക് ഷീനയുടെ മരണശേഷം രാജിക്കത്ത് അയച്ചത് മിഖായേല് ആണെന്നാണ് ഇപ്പോള് ലഭിക്കുന്ന വിവരം.
ഷീനയുടെ ഫേസ്ബുക്ക് ഇമെയില് പാസ് വേര്ഡുകള് മിഖായേലിന് അറിയാമായിരുന്നു. മെയില് വഴിയാണ് രാജിക്കത്ത് അയച്ചത്. കൂടാതെ ഷീനയുടെ ഫേസ്ബുക്ക് അക്കൗണ്ടും മിഖായേല് ഉപയോഗിച്ചിരുന്നു. ഇന്ദ്രാണി മുഖര്ജിയുടെ നിര്ദ്ദേശപ്രകാരമാണ് മിഖായേല് ഇക്കാര്യം ചെയ്തിരുന്നതെന്ന് ദേശീയ മാധ്യമം റിപ്പോര്ട്ടു ചെയ്തു.
മാസം 12,000 രൂപ മിഖായേലിന് ഇന്ദ്രാണി പോക്കറ്റ് മണിയായി നല്കാറുണ്ടായിരുന്നു. താന് പറയുന്നത് അനുസരിച്ചില്ലെങ്കില് പോക്കറ്റ് മണി നല്കില്ലെന്ന് ഇന്ദ്രാണി ഭീഷണിപ്പെടുത്തി. മാത്രമല്ല, സഹോദരിയുടെ കാര്യത്തെക്കുറിച്ച് പുറത്തുപറയാതിരിക്കാന് വലിയൊരു തുക ഇന്ദ്രാണി മിഖായേലിന് വാഗ്ദാനം ചെയ്യുകയും ചെയ്തിരുന്നത്രേ.