യുപിയില്‍ തോല്‍വി ഉറപ്പിച്ച് കോണ്‍ഗ്രസ്

ലക്‌നൗ: ദില്ലിയില്‍ കോണ്‍ഗ്രസിന്റെ പതനം പൂര്‍ത്തിയാക്കിയ ഷീലാ ദീക്ഷിതിനെ യുപിയില്‍ മുഖ്യമന്ത്രി സ്ഥാനാര്‍ഥിയാക്കി കോണ്‍ഗ്രസ് വീണ്ടും പരീക്ഷണ രാഷ്ട്രീയത്തിനൊരുങ്ങുന്നു. കോണ്‍ഗ്രസ് ജനറല്‍ സെക്രട്ടറി ജനാര്‍ദ്ദന്‍ ദ്വിവേദിയാണ് പാര്‍ട്ടി ഹെഡ്ക്വാര്‍ട്ടേഴ്‌സില്‍വെച്ച് ഷീലാ ദീക്ഷിതിന്റെ സ്ഥാനാര്‍ഥിത്വം പ്രഖ്യാപിച്ചത്.

ജനകീയ പിന്തുണ പൂര്‍ണമായും നഷ്ടപ്പെട്ട ഒരു രാഷ്ട്രീയ നേതാവിനെവെച്ച് കോണ്‍ഗ്രസ് ബലപരീക്ഷണത്തിന് ഒരുങ്ങുന്നത് രാഷ്ട്രീയ വൃത്തങ്ങളെ ഞെട്ടിച്ചിട്ടുണ്ട്. പ്രിയങ്ക ഗാന്ധിയെ മുഖ്യമന്ത്രി സ്ഥാനാര്‍ഥിയാക്കുമെന്നായിരുന്നു നേരത്തെയുണ്ടായിരുന്ന റിപ്പോര്‍ട്ട്. എന്നാല്‍, അപ്രതീക്ഷിതമായാണ് ഷീലാ ദീക്ഷിതിന്റെ പേര്‍ ഉയര്‍ന്നുവന്നത്.

കോണ്‍ഗ്രസിന്റെ തെരഞ്ഞെടുപ്പ് പ്രചരണം നയിക്കുന്ന പ്രശാന്ത് കിഷോര്‍ ആണ് ഷീലാ ദീക്ഷിതിനെ മുഖ്യമന്ത്രി സ്ഥാനാര്‍ഥിയായി നിര്‍ദ്ദേശിച്ചത്. ഉത്തര്‍ പ്രദേശിലെ ബ്രാഹ്മണ സമുദായത്തിന്റെ വോട്ടുബാങ്കാണ് പ്രശാന്ത് കിഷോര്‍ ലക്ഷ്യമിടുന്നത്. നേരത്തെ മായാവതിക്കായിരുന്നു വലിയൊരു ശതമാനം ബ്രാഹ്മണ്‍ വോട്ട് ലഭിച്ചുകൊണ്ടിരുന്നത്.

അതേസമയം, ദില്ലിയില്‍ ഷീലാ ദീക്ഷിതിനെതിരെ അഴിമതിക്കേസ് ബിജെപി പ്രചരണത്തിലെ മുഖ്യ വിഷയമാക്കും. ദില്ലിയില്‍ കോണ്‍ഗ്രസിന്റെ തകര്‍ച്ചയ്ക്ക് പ്രധാന കാരണം ഷീലാ ദീക്ഷിത് ആണെന്ന ആരോപണമുണ്ടായിരുന്നു. എന്നാല്‍ ഇക്കാര്യം തള്ളിക്കളഞ്ഞാണ് കോണ്‍ഗ്രസ് എഴുപത്തിയെട്ടുകാരിയായ ഷീലാ ദീക്ഷിതില്‍ വിശ്വാസമര്‍പ്പിച്ചിരിക്കുന്നത്.

English summary

Sheila Dikshit named Cong chief minister candidate for UP assembly polls