സിക്കിമിൽ മണ്ണിടിച്ചിൽ; ടീസ്റ്റ നദിയിലെ 510 മെഗാവാട്ട് ജലവൈദ്യുത പദ്ധതിക്ക് കേടുപാട്
സിക്കിം: സിക്കിമിൽ ഉണ്ടായ മണ്ണിടിച്ചിലിൽ ടീസ്റ്റ നദിയിലെ 510 മെഗാവാട്ട് ജലവൈദ്യുത പദ്ധതിക്ക് വ്യാപകമായ നാശനഷ്ടം. ചൊവ്വാഴ്ച കിഴക്കൻ സിക്കിമിൽ ആണ് കൂറ്റൻ മണ്ണിടിച്ചിൽ ഉണ്ടായത്. നാഷണൽ ഹൈഡ്രോ ഇലക്ട്രിക് പവർ കോർപ്പറേഷൻ (എൻ എച്ച് പി സി) നിയന്ത്രിക്കുന്ന ടീസ്റ്റ സ്റ്റേജ് V ജലവൈദ്യുത പദ്ധതിയുടെ പവർഹൗസിന് കാര്യമായ നാശനഷ്ടമുണ്ടായി.
രാവിലെ 7: 30 ഓടെ ഗാങ്ടോക്ക് ജില്ലയിലെ സിങ്താമിന് സമീപമുള്ള ദിപു ദാരയിലാണ് സംഭവം. മലയുടെ ഒരു ഭാഗം ഇടിഞ്ഞ് വീഴുകയായിരുന്നു. സംഭവത്തിന്റെ ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്. മണ്ണിടിച്ചിലിൽ പദ്ധതിയുടെ ജി ഐ എസ് കെട്ടിടത്തിനും സാരമായ കേടുപാടുകൾ സംഭവിച്ചു.
സ്ഥിതിഗതികൾ വിലയിരുത്തുന്നതിനും പുനരുദ്ധാരണ നടപടികൾ ശുപാർശ ചെയ്യുന്നതിനുമായി ഡൽഹിയിൽ നിന്നുള്ള ഒരു സാങ്കേതിക സംഘം സ്ഥലം സന്ദർശിക്കും. ദുരന്തത്തിൽ 17-18 വീടുകൾക്ക് കേടുപാടുകൾ സംഭവിച്ചു, ആറ് വീടുകളിൽ നിന്ന് ആളുകളെ ഒഴിപ്പിച്ചു. ദുരിതബാധിതരായ കുടുംബങ്ങളെ ദുരിതാശ്വാസ ക്യാമ്പായി സജ്ജമാക്കിയ ബലൂതാറിലെ എൻ എച്ച്പി സി ഗസ്റ്റ് ഹൗസിലേക്ക് മാറ്റിപ്പാർപ്പിച്ചു.
മണ്ണിടിച്ചിലിനെത്തുടർന്ന് സിങ്തം - ദിക്ച്ചു റോഡ് ഗതാഗതയോഗ്യമല്ലാതായി. അതേ പാതയിലൂടെ ഡോച്ചും വഴി ഒരു താൽക്കാലിക വഴിതിരിച്ചുവിടൽ തയ്യാറാക്കിയിട്ടുണ്ട്. റോഡിൻ്റെ പുനരുദ്ധാരണ പ്രവർത്തനങ്ങൾ ഉടൻ ആരംഭിക്കാൻ ഗാംഗ്ടോക്ക് ജില്ലാ കളക്ടർ തുഷാർ നിഖാരെ ബോർഡർ റോഡ്സ് ഓർഗനൈസേഷനോട് (ബി ആർഒ) അഭ്യർത്ഥിച്ചു. റോഡ് എത്രയും വേഗം പ്രവർത്തനക്ഷമമാക്കുമെന്ന് ബി ആർ ഒ ഉറപ്പുനൽകിയിട്ടുണ്ട്.
അതിനിടെ, മണ്ണിടിച്ചിലിനെക്കുറിച്ച് സമഗ്രമായ അന്വേഷണം നടത്താനും ഹ്രസ്വകാലവും ദീർഘകാലവുമായ പുനരുദ്ധാരണ ശ്രമങ്ങൾക്കുള്ള ശുപാർശകൾ നൽകാനും മൈൻസ് ആൻഡ് ജിയോളജി വകുപ്പിനെ ചുമതലപ്പെടുത്തിയിട്ടുണ്ട്. കഴിഞ്ഞ ജൂണിൽ, കനത്ത മഴയെ തുടർന്നുണ്ടായ മണ്ണിടിച്ചിലിനെത്തുടർന്ന് വടക്കൻ സിക്കിമിൽ ചില വിദേശ പൗരന്മാർ ഉൾപ്പെടെയുള്ള വിനോദസഞ്ചാരികൾ കുടുങ്ങിയിരുന്നു.
വടക്കൻ, തെക്കൻ സിക്കിമിലെ മണ്ണിടിച്ചിലിൽ ഒമ്പത് പേർ മരിച്ചിരുന്നു, നിരവധി വീടുകൾക്ക് കേടുപാടുകൾ സംഭവിച്ചു. വൈദ്യുതി, വാർത്താവിനിമയ ലൈനുകൾ വിച്ഛേദിക്കപ്പെട്ടു, റോഡുകളും പാലങ്ങളും മണ്ണിടിച്ചിലിൽ ഒലിച്ചുപോയിരുന്നു. 2023-ൽ ഹിമപാത തടാകം പൊട്ടിത്തെറിച്ചുണ്ടായ വെള്ളപ്പൊക്കത്തിൽ ആയിരക്കണക്കിന് വിനോദസഞ്ചാരികളെ വിമാനമാർഗം സുരക്ഷിത സ്ഥാനത്തേക്ക് മാറ്റിയിരുന്നു.
Click it and Unblock the Notifications
Sign in with Google