സിന്ധുവിന് ഒരു കോച്ച് ഉണ്ട്, പക്ഷേ എനിയ്ക്കത് ഉണ്ടായിരുന്നില്ല... ഗോപീചന്ദിന്റെ ഭാര്യ പറയുന്നു
ഹൈദരാബാദ്: പുല്ലേല ഗോപീചന്ദ് എന്ന പരിശീലകനെ എല്ലാവര്ക്കും അറിയാം. ഇന്ത്യയ്ക്ക് രണ്ട് ഒളിംപിക് മെഡലുകള് വാങ്ങിത്തന്ന പരിശീലകനാണ് അദ്ദേഹം. സൈന നെഹ് വാളിലൂടെ വെങ്കലവും ഇപ്പോള് പിവി സിന്ധുവിലൂടെ വെള്ളിയും.
ഓള് ഇംഗ്ലണ്ട് ബാഡ്മിന്റണ് ചാമ്പ്യന്ഷിപ്പ് സ്വന്തമാക്കിയ രണ്ടാമത്തെ ഇന്ത്യക്കാരനാണ് ഗോപി. കളിച്ച കാലത്ത് ഇന്ത്യക്ക് പേരും പെരുമയും ഉണ്ടാക്കിത്തന്നു. ഇപ്പോള് പരിശീലകനായും അങ്ങനെ തന്നെ. എന്നാല് പിവിവി ലക്ഷ്മി എന്ന സ്ത്രീയെ നിങ്ങളില് എത്ര പേര്ക്ക് അറിയാം?
ഗോപീചന്ദിന്റെ ഭാര്യയാണ് പിവിവി ലക്ഷ്മി. അത് മാത്രമല്ല ലക്ഷ്മിയുടെ വിശേഷണം... ഇന്ത്യക്ക് വേണ്ടി ബാഡ്മിന്റണില് ഒളിംപിക്സില് പങ്കെടുത്ത താരം. 1996 ലെ അറ്റ്ലാന്റ ഒളിംപിക്സില് ആയിരുന്നു ലക്ഷ്മി ഇന്ത്യയെ പ്രതിനിധീകരിച്ചത്. ഇപ്പോള് ഗോപിയുടെ അക്കാദമിയില് എല്ലാ സഹായത്തിനും ലക്ഷ്മിയുണ്ട്.
സിന്ധുവിന് ഒളിംപിക്സില് വെള്ളിമെഡല് കിട്ടിയ സംഭവത്തിനോട് ലക്ഷ്മി പ്രതികരിച്ചത് ഇങ്ങനെ ആയിരുന്നു- സിന്ധുവിന് ഒരു പരിശാലകന് ഉണ്ട്, പക്ഷേ എനിയ്ക്കത് ഉണ്ടായിരുന്നില്ല.
സംഗതി ശരിയാണ് സിന്ധുവിനായാലും സൈനയ്ക്കായാലും മികച്ച പരിശീലനം നല്കാന് ഗോപിയുണ്ടായിരുന്നു. ലക്ഷ്മിയുടെ കാലത്ത് അതിനുള്ള സൗകര്യങ്ങള് ഒന്നും തന്നെ ഉണ്ടായിരുന്നില്ല.