ഗുജറാത്തില് വിഷവാതകം ശ്വസിച്ച് ആറ് പേര് മരിച്ചു; സംഭവം ഇന്ന് പുലര്ച്ചെ
ഗാന്ധിനഗര്: സൂറത്തിലെ ഒരു കമ്പിനിയില് വിഷവാതകം ശ്വസിച്ചതിനെ തുടര്ന്ന് ആറ് പേര് മരിച്ചു. 20 പേരെ ആശുപത്രിയില് പ്രവേശിപ്പിച്ചു. സച്ചിന് ജിഐഡിസി ഭാഗത്ത് ഇന്ന് പുലര്ച്ചെയാണ് സംഭവം. സച്ചിന് ഇന്ഡസ്ട്രിയല് ഏരിയയില് സ്ഥിതി ചെയ്യുന്ന ഡൈയിംഗ് ഫാക്ടറിക്കുള്ളിലായിരുന്നു തൊഴിലാളികളെന്ന് സൂറത്ത് മുനിസിപ്പല് കോര്പ്പറേഷന്റെ ഇന്ചാര്ജ് ചീഫ് ഫയര് ഓഫീസര് ബസന്ത് പരീഖ് പറഞ്ഞു. ഫാക്ടറിക്ക് സമീപം നിര്ത്തിയിട്ടിരുന്ന ടാങ്കറില് നിന്നാണ് വിഷപുക പുറത്തേക്ക് വന്നതെന്നാണ് നിഗമനം. വിഷപുക ശ്വസിച്ച് 25 മുതല് 26 വരെ തൊഴിലാളികളാണ് ബോധ രഹിതരായി വീണതെന്ന് അധികൃതര് പറഞ്ഞു.
അവരെയെല്ലാം പുതിയ സിവില് ആശുപത്രിയില് എത്തിച്ചു. കുറഞ്ഞത് ആറ് തൊഴിലാളികളെങ്കിലും ആശുപത്രിയില് ഇതുവരെ മരിച്ചുവെന്നും ഉദ്യോഗസ്ഥര് പറഞ്ഞു. തുടര്ന്ന് അഗ്നിശമന സേനയെത്തി വാല്വിന്റെ ചോര്ച്ച തടയുകയായിരുന്നു.