സോഷ്യല്‍ മീഡിയ: കുട്ടികള്‍ക്ക് പൂട്ടിടാന്‍ കര്‍ണാടകയും ആന്ധ്രയും കേരളവും; സുപ്രധാന തീരുമാനം ഉടന്‍

കുട്ടികളുടെ സോഷ്യല്‍ മീഡിയ ഉപയോഗത്തിന് പൂട്ടിടാന്‍ ദക്ഷിണേന്ത്യന്‍ സംസ്ഥാനങ്ങള്‍. കര്‍ണാടക, ആന്ധ്രാപ്രദേശ്, കേരളം എന്നീ സംസ്ഥാനങ്ങളാണ് കുട്ടികള്‍ക്ക് സോഷ്യല്‍ മീഡിയ പ്രവേശനം നിരോധിക്കാന്‍ ഗൗരവമായി ആലോചിക്കുന്നത്. ഓസ്‌ട്രേലിയയില്‍ കുട്ടികളുടെ സോഷ്യല്‍ മീഡിയ ഉപയോഗം നിരോധിച്ച മാതൃകയില്‍ നിരോധനം നടപ്പാക്കാനാണ് നീക്കങ്ങള്‍ നടത്തുന്നത്. കുട്ടികളുടെ മാനസികാരോഗ്യവും സുരക്ഷയും മുന്‍നിര്‍ത്തിയാണ് സോഷ്യല്‍ മീഡിയ ഉപയോഗത്തിന് കര്‍ശന നിയന്ത്രണമേര്‍പ്പെടുത്താന്‍ ദക്ഷിണേന്ത്യന്‍ സംസ്ഥാനങ്ങള്‍ ഒരുങ്ങുന്നത്.

കര്‍ണാടകയില്‍ 16 വയസിന് താഴെയുള്ള കുട്ടികള്‍ക്ക് സോഷ്യല്‍ മീഡിയ ഉപയോഗിക്കുന്നതിന് പൂര്‍ണനിരോധനം ഏര്‍പ്പെടുത്തുമെന്ന് മുഖ്യമന്ത്രി സിദ്ധരാമയ്യ പ്രഖ്യാപിച്ചു. 2026-27 സാമ്പത്തിക വര്‍ഷത്തെ സംസ്ഥാന ബജറ്റ് അവതരിപ്പിക്കവേയാണ് അദ്ദേഹം ഇന്ന് ഈ സുപ്രധാന തീരുമാനം അറിയിച്ചത്. ഇതോടെ കുട്ടികള്‍ക്ക് സോഷ്യല്‍ മീഡിയ നിയന്ത്രണം ഏര്‍പ്പെടുത്തുന്ന ഇന്ത്യയിലെ ആദ്യ സംസ്ഥാനമായി കര്‍ണാടക മാറും.

കര്‍ണാടകയ്ക്ക് പിന്നാലെ 13 വയസിന് താഴെയുള്ള കുട്ടികളുടെ സോഷ്യല്‍ മീഡിയ പ്രവേശനം നിരോധിക്കാനാണ് ആന്ധ്രാപ്രദേശ് സര്‍ക്കാരിന്റെയും തീരുമാനം. 90 ദിവസത്തിനുള്ളില്‍ പുതിയ മാര്‍ഗനിര്‍ദേശങ്ങള്‍ രൂപീകരിക്കും. കര്‍ണാടകയ്ക്കും ആന്ധ്രാപ്രദേശിനും പിന്നാലെ കേരളവും ഇക്കാര്യത്തില്‍ ഗൗരവമായ നടപടികളിലേക്ക് കടന്നിരുന്നു. മൊബൈല്‍ ഫോണിന്റെയും സോഷ്യല്‍ മീഡിയയുടെയും അമിത ഉപയോഗം കുട്ടികളിലുണ്ടാക്കുന്ന ദോഷഫലങ്ങള്‍ തടയുക എന്നതാണ് ഈ നീക്കത്തിലൂടെ സര്‍ക്കാരുകള്‍ ലക്ഷ്യമിടുന്നത്.

കുട്ടികളുടെ മാനസികാരോഗ്യം, ഉറക്കം, സുരക്ഷ എന്നിവ ഉറപ്പാക്കുന്നതിനൊപ്പം വിദ്യാഭ്യാസ മേഖലയില്‍ ആര്‍ട്ടിഫിഷ്യല്‍ ഇന്റലിജന്‍സ് അധിഷ്ഠിത പഠനരീതികള്‍ നടപ്പാക്കാനും കര്‍ണാടക പദ്ധതിയിടുന്നുണ്ട്.

ആന്ധ്രാപ്രദേശിലും സമാനമായ രീതിയില്‍ 13 വയസിന് താഴെയുള്ള കുട്ടികള്‍ക്ക് സോഷ്യല്‍ മീഡിയ ഉപയോഗിക്കുന്നതിന് വിലക്കേര്‍പ്പെടുത്തുമെന്നാണ് മുഖ്യമന്ത്രി ചന്ദ്രബാബു നായിഡുവിന്റെ പ്രഖ്യാപനം. നിയമസഭയില്‍ നടത്തിയ പ്രഖ്യാപനപ്രകാരം, ഇതിനായുള്ള പുതിയ മാര്‍ഗ്ഗരേഖകള്‍ 90 ദിവസത്തിനകം തയ്യാറാക്കാന്‍ അദ്ദേഹം ഉദ്യോഗസ്ഥര്‍ക്ക് നിര്‍ദേശം നല്‍കി. കുട്ടികളുടെ ഭാവിയെ കരുതി ഇത്തരം നിയന്ത്രണങ്ങള്‍ അനിവാര്യമാണെന്നാണ് ആന്ധ്ര സര്‍ക്കാരിന്റെ നിലപാട്.

അയല്‍ സംസ്ഥാനങ്ങളുടെ ഈ തീരുമാനങ്ങള്‍ക്ക് പിന്നാലെ കേരളവും വിഷയത്തില്‍ ഗൗരവമായ ചര്‍ച്ചകള്‍ നടത്തുന്നുണ്ട്. കുട്ടികളിലെ സോഷ്യല്‍ മീഡിയ ഉപയോഗം നിയന്ത്രിക്കുന്നത് സംബന്ധിച്ച പ്രായോഗിക വശങ്ങളും നിയമപരമായ കാര്യങ്ങളും പഠിക്കുന്നതിനായി കേരള സര്‍ക്കാര്‍ ഒരു ഉന്നതതല സമിതിയെ നിയോഗിച്ചു. ഈ സമിതി നല്‍കുന്ന റിപ്പോര്‍ട്ടിന്റെ അടിസ്ഥാനത്തിലായിരിക്കും കേരളത്തില്‍ ഏത് പ്രായത്തിലുള്ള കുട്ടികള്‍ക്ക് നിയന്ത്രണം വേണമെന്ന കാര്യത്തില്‍ അന്തിമ തീരുമാനമെടുക്കുക. ഓസ്ട്രേലിയയും ബ്രിട്ടനും ഉള്‍പ്പെടെയുള്ള രാജ്യങ്ങള്‍ നേരത്തെ തന്നെ ഇത്തരം നിരോധനങ്ങള്‍ കൊണ്ടുവന്നത് മാതൃകയാക്കിയാണ് ഇന്ത്യന്‍ സംസ്ഥാനങ്ങളും ഇപ്പോള്‍ ഈ പാത പിന്തുടരുന്നത്.