സുന്ദരികള്‍ക്ക് സംരക്ഷണമെന്ന സോംനാഥ്; സൗന്ദര്യമില്ലാത്തതുകൊണ്ടാവാം പീഡിപ്പിച്ചതെന്ന് ഭാര്യ

ദില്ലി: സുന്ദരികള്‍ക്ക് ദില്ലി സര്‍ക്കാര്‍ സംരക്ഷണം നല്‍കുമെന്ന വിവാദ പ്രസ്താവന നടത്തിയ ആം ആദ്മി പാര്‍ട്ടി നേതാവ് സോംനാഥ് ഭാരതിക്കെതിരെ ഭാര്യയുടെ ഒളിയമ്പ്. താനൊരു ശരാശരിക്കാരിയായ സ്ത്രീയാണ്. സൗന്ദര്യമില്ലാത്തതിനാലാകാണ് തന്നെ പീഡിപ്പിച്ചതെന്ന് അവര്‍ പ്രതികരിച്ചു. നേരത്തെ സോംനാഥിനെതിരെ ഗാര്‍ഹിക പീഡനത്തിന് ഭാര്യ ലിപിക മിത്ര പരാതി നല്‍കിയിരുന്നു.

തന്റെ സംരക്ഷണം ഏറ്റെടുക്കാന്‍ കഴിയാത്ത സോംനാഥ് ഇപ്പോള്‍ സുന്ദരിമാരെ സംരക്ഷിക്കുമെന്നാണ് പറയുന്നത്. ഇപ്പോള്‍ കാര്യങ്ങള്‍ വ്യക്തമായിരിക്കുകയാണെന്നും ലിപിക പറഞ്ഞു. ദില്ലി പോലീസിന്റെ ചുമതല ആം ആദ്മി പാര്‍ട്ടിക്ക് നല്‍കുകയാണെങ്കില്‍ സുന്ദരികളായ സ്ത്രീകള്‍ക്ക് സംരക്ഷണം നല്‍കുമെന്നായിരുന്നു സോംനാഥിന്റെ പ്രസ്താവന.

ദില്ലിയില്‍ വര്‍ധിച്ചുവരുന്ന സ്ത്രീപീഡനങ്ങളെക്കുറിച്ച് സൂചിപ്പിച്ചായിരുന്നു സോംനാഥ് ഭാരതിയുടെ വിവാദ പ്രസ്താവന. എല്ലാ സ്ത്രീകള്‍ക്കും സംരക്ഷണം നല്‍കുമെന്ന് പറയുന്നതിന് പകരം സുന്ദരിമാര്‍ക്ക് സംരക്ഷണം നല്‍കുമെന്ന് പറഞ്ഞത് എന്ത് അര്‍ഥത്തിലാണെന്ന് വ്യക്തമല്ല. പ്രസ്താവന വിവാദമായെങ്കിലും അതേക്കുറിച്ച് സോംനാഥ് വിശദീകരണം നല്‍കിയിരുന്നുമില്ല.

നേരത്തെ ഭാര്യയെ മാനസികവും ശാരീരികവുമായ പീഡനമേല്‍പ്പിച്ചെന്ന പേരില്‍ മുന്‍ ആം ആദ്മി മന്ത്രികൂടിയായ സോംനാഥിനെതിരെ ഭാര്യ വനിതാ കമ്മീഷനില്‍ പരാതി നല്‍കിയിരുന്നു. സോംനാഥില്‍ നിന്നും വിവാഹമോചനം വേണമെന്നും അവര്‍ ആവശ്യപ്പെട്ടിട്ടുണ്ട്. വിഷയത്തില്‍ അന്വേഷണം നടന്നുകൊണ്ടിരിക്കുകയാണ്.

English summary

Somnath Bharti's wife says I'm average looking, maybe that's why he ill-treated me