പ്രതിപക്ഷ നേതാവിനെ കണ്ടെത്താനാവാതെ ഹരിയാന കോണ്‍ഗ്രസ്, ഇനി സോണിയ തീരുമാനിക്കും!!

ചണ്ഡീഗഡ്: ഹരിയാനയില്‍ അപ്രതീക്ഷിത നേട്ടം കോണ്‍ഗ്രസ് സ്വന്തമാക്കിയെങ്കിലും പ്രതിപക്ഷ നേതാവിനെ ചൊല്ലി വിഭാഗീയത കടുക്കുന്നു. ഭൂപീന്ദര്‍ ഹൂഡയെ പ്രതിപക്ഷ നേതാവാക്കണമെന്നാണ് ഭൂരിഭാഗം ആവശ്യപ്പെടുന്നത്. എന്നാല്‍ കിരണ്‍ ചൗധരി ഇതേ ആവശ്യവുമായി രംഗത്ത് വന്നത് കോണ്‍ഗ്രസിനെ പ്രതിസന്ധിയിലാക്കിയിരിക്കുകയാണ്. ഇതോടെ പ്രതിപക്ഷ നേതാവിനെ തീരുമാനിക്കുന്ന കാര്യം സോണിയാ ഗാന്ധിയിലേക്ക് എത്തിയിരിക്കുകയാണ്.

സോണിയ തര്‍ക്കത്തില്‍ ഇടപെടുമെന്ന് വ്യക്തിമാക്കി കഴിഞ്ഞു. അതേസമയം ഭൂപീന്ദര്‍ ഹൂഡയ്ക്കാണ് പ്രതിപക്ഷ നേതാവിന്റെ സ്ഥാനത്തേക്ക് സാധ്യത കല്‍പ്പിക്കപ്പെടുന്നത്. നേരത്തെ മധ്യപ്രദേശ്, ഛത്തീസ്ഗഡ്, രാജസ്ഥാന്‍ സംസ്ഥാനങ്ങളില്‍ കോണ്‍ഗ്രസ് വിജയിച്ചപ്പോള്‍ മുഖ്യമന്ത്രിയെ കണ്ടെത്തുന്നതിലും തര്‍ക്കം ഉണ്ടായിരുന്നു. അന്ന് ദേശീയ അധ്യക്ഷനായിരുന്ന രാഹുല്‍ ഗാന്ധിയാണ് പ്രശ്‌നങ്ങള്‍ പരിഹരിച്ചത്. ഇത് മുന്നില്‍ കണ്ടാണ് സോണിയയെ സമീപിച്ചിരിക്കുന്നത്.

സംസ്ഥാന സമിതി യോഗത്തില്‍ മുന്‍ നേതാവായിരുന്ന കിരണ്‍ ചൗധരി പാര്‍ട്ടിക്കുള്ളില്‍ മേധാവിത്തം നേടാനുള്ള ശ്രമത്തിലാണ്. കുറച്ച് എംഎല്‍എമാരുടെ പിന്തുണയും അദ്ദേഹത്തിനുണ്ട്. എന്നാല്‍ സംസ്ഥാനത്തെ ജാട്ടുകളുടെ നല്ലൊരു പിന്തുണ ഭൂപീന്ദര്‍ ഹൂഡയ്ക്കുണ്ട്. ഇതാണ് കോണ്‍ഗ്രസ് പ്രകടനം മെച്ചപ്പെടുത്താനും സഹായിച്ചത്. അതുകൊണ്ട് ഹൂഡയ്ക്ക് തന്നെ നിയമസഭാ കക്ഷി നേതാവിന്റെ പദവി നല്‍കിയേക്കും. എന്നാല്‍ ചൗധരി ദേശീയ നേതൃത്വത്തില്‍ കടുത്ത സമ്മര്‍ദം ചെലുത്തുന്നുണ്ട്.

സംസ്ഥാന സമിതിയില്‍ 25 എംഎല്‍എമാര്‍ ഭൂപീന്ദര്‍ ഹൂഡയെ പിന്തുണച്ചു. എന്നാല്‍ കിരണ്‍ ചൗധരിക്ക് വെറും ആറ് പേരുടെ പിന്തുണയാണ് ലഭിച്ചത്. ഹരിയാനയുടെ ചുമതലയുള്ള ജനറല്‍ സെക്രട്ടറി ഗുലാം നബി ആസാദിന്റെ നേതൃത്വത്തിലാണ് യോഗം നടന്നത്. ബിജെപിയെ എതിര്‍ക്കാന്‍ ശക്തമായ പ്രതിപക്ഷം വേണമെന്നാണ് കോണ്‍ഗ്രസിന്റെ നിലപാട്. ഹൂഡയ്ക്ക് മാത്രമേ അതിനുള്ള കരുത്തും വോട്ടുബാങ്കുമുള്ളൂ എന്ന് സോണിയാ ഗാന്ധിക്ക് അഭിപ്രായമുണ്ട്.

English summary

sonia gandhi will elect new leader in haryana