'പാവം സ്ത്രീ പരാമർശം'; സോണിയ ​ഗാന്ധിക്കെതിരെ ബിജെപിയുടെ അവകാശലംഘന നോട്ടീസ്

ഡൽഹി: രാഷ്ട്രപതി ദ്രൗപതി മുർമുവിനെക്കുറിച്ചുള്ള പരാമർശത്തിന്റെ പേരിൽ മുതിർന്ന കോൺ​ഗ്രസ് നേതാവ് സോണിയ ​ഗാന്ധിക്കെതിരെ ബി ജെ പി എം പിമാർ തിങ്കളാഴ്ച അവകാശലംഘന നോട്ടീസ് അവതരിപ്പിച്ചതായി റിപ്പോർട്ടുകൾ‌. ജനുവരി 31 ന് പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്യുന്നതിനിടെ സോണിയ ​ഗാന്ധി രാഷ്ട്രപതി മുർമുവിനെ പാവം എന്ന് പരാമർശിച്ചതാണ് വിവാ​ദത്തിന് കാരണമായത്.

ബജറ്റിന് മുന്നോടിയായി രാഷ്ട്രപതി സംസാരിച്ചപ്പോഴാണ് വായിച്ച് ക്ഷീണിച്ച് അവസാനമായപ്പോഴേക്കും സംസാരിക്കാൻ പോലും വയ്യാതായി കഷ്ടം എന്നാണ് സോണിയ ​ഗാന്ധി പറഞ്ഞത്. സോണിയയുടെ പരാമർശങ്ങൾ രാജ്യത്തിന്റെ പരമോന്നത ഭരണഘടന സ്ഥാനത്തിന് നേരെയുള്ള അവമതിപ്പാണെന്നും ഇതിനെ അപലപിക്കുന്നുവെന്നും ബി ജെ പി അം​ഗങ്ങൾ പറഞ്ഞു.

സോണിയയുടെ വാക്കുകശ്‍ രാഷ്ട്രപതിയെ ആക്ഷേപിക്കുന്നതും അപകീർത്തിപ്പെടുത്തുന്നതും രാജ്യത്തിന്റെ അത്യുന്നത പദവിയുടെ മഹിമ ഇടിച്ചുതാഴ്ത്തുന്നതുമാണെന്ന് ബി ജെ പി എംപിമാർ പറയുന്നു.

'' സോണിയയുടെ പരാമർശം രാഷ്ട്രപതിക്കെതിരെയാണ്. അതും പാർലമെന്റ് വളപ്പിന് ഉള്ളിൽ വെച്ച്. ആദിവാസി വിഭാ​ഗത്തിന്റെ പ്രതിസന്ധികളെക്കുറിച്ച് ഇനിയും മനസ്സിലാക്കിയിട്ടില്ലാത്ത സോണിയയുടെ ആദിവാസി വിരുദ്ധ മനോഭാവമാണ് ഇതിലൂടെ വ്യക്തമാകുന്നത്. വിഷയത്തിന്റെ വ്യാപ്തി കണക്കിലെടുത്ത് സോണിയയ്ക്കെതിരെ അച്ചടക്ക നടപടിയെടുക്കണം' എന്നും എം പിമാർ പറഞ്ഞു.

സോണിയയുടെ പ്രസ്താവന ചർച്ചയായതോടെ സോണിയ ​ഗാന്ധിയുടെ പരാമർശത്തിൽ അതൃപ്തി പ്രകടിപ്പിച്ച് രാഷ്ട്രപതി ഭവനും പ്രസ്താവന ഇറക്കി. രാഷ്ട്രപതി ഭവന്റെ അന്തസ്സിനെ മുറിവേൽപ്പിക്കുന്ന വാക്കുകളാണ് കോൺ​ഗ്രസ് നേതാവിൽ നിന്ന് ഉണ്ടായതെന്ന് രാഷ്ട്രപതി ഭവൻ പുറത്തിറക്കിയ പ്രസ്താവനയിൽ പറയുന്നു.

എന്നാൽ പരാമർശം തെറ്റായി വ്യാഖ്യാനിക്കപ്പെട്ടെന്നും യാതൊരു വിധത്തിലുമുള്ള അനാദരവും സോണിയ ​ഗാന്ധിയുടെ ഭാ​ഗത്ത് നിന്ന് ഉണ്ടായിട്ടില്ലെന്നും മകളും എം പിയുമായ പ്രിയങ്ക ​ഗാന്ധി പറഞ്ഞു.

'' എന്റെ അമ്മയ്ക്ക് 78 വയസ്സാണ് പ്രായം. ദൈർഘ്യമുള്ള പ്രസം​ഗമാണ് രാഷ്ട്രപതി നടത്തിയതെന്നും അതിനാൽ അവർ ക്ഷീണിതയായിട്ടുണ്ടാകുമെന്നും ആണ് അമ്മ ഉദ്ദേശിച്ചത്. രാഷ്ട്രപതിയെ പൂർണമായും ബഹുമാനിക്കുന്ന ആളാണ് സോണിയ ​ഗാന്ധി. അവർ നടത്തിയ പരാമർശം തെറ്റായി വ്യാഖ്യാനിക്കപ്പെട്ടത് ദൗർഭാ​ഗ്യകരമാണ്. അമ്മയും രാഷ്ട്രപതിയും ആദരിക്കപ്പെടേണ്ടവരാണ്. നമ്മളെക്കാൾ പ്രായം കൂടിയവരാണ്. സോണിയയെ ഇത്തരം ഒരു സാഹചര്യത്തിലേക്ക് എത്തിച്ചതിൽ ബി ജെ പി മാപ്പ് പറയണം '' പ്രിയങ്കാ ​ഗാന്ധി പറഞ്ഞു.