സൗമ്യ വധം: സുപ്രീം കോടതി വിധി തെറ്റെന്ന് മാര്ക്കണ്ഡേയ കട്ജു... ആ പറയുന്നതിലും കാര്യമില്ലേ?
ദില്ലി: സൗമ്യ വധക്കേസില് പ്രതി ഗോവിന്ദച്ചാമിയുടെ വധശിക്ഷ റദ്ദാക്കിയ സുപ്രീം കോടതി വിധിക്കെതിരെ മുന് ജഡ്ജി മാര്ക്കണ്ഡേയ കട്ജു. സുപ്രീം കോടതി ജഡ്ജിയും പ്രസ് കൗണ്സില് ഓഫ് ഇന്ത്യ ചെയര്മാനുമായിരുന്നു ജസ്റ്റിസ് കട്ജു. സൗമ്യ വധക്കേസിലെ വിധിന്യായം കടുത്ത പിഴവുകളുള്ളതാണ് എന്ന് കട്ജു തന്റെ ഫേസ്ബുക്ക് പോസ്റ്റിലാണ് പറഞ്ഞത്.
ഗോവിന്ദച്ചാമിയുടെ ജീവപര്യന്തവും മാധ്യമങ്ങളുടെ ആക്രാന്തവും.. പിന്നെ ട്രോളന്മാര് വെറുതെ ഇരിക്കുമോ!!!
കേട്ടുകേള്വിയെ ആശ്രയിച്ച് രണ്ടുപേര് നല്കിയ മൊഴിയെ ആശ്രയിച്ചാണ് കൊലപാതകക്കുറ്റത്തില് നിന്ന് ഗോവിന്ദച്ചാമിയെ കോടതി ഒഴിവാക്കിയത്. ഇതു തെളിവായി കണക്കാക്കാന് കഴിയാത്ത മൊഴികളാണ്. സംശയത്തിന്റെ ആനുകൂല്യം നല്കി വധശിക്ഷ ഒഴിവാക്കിയത് അംഗീകരിക്കാന് കഴിയില്ലെന്നും ഫേസ്ബുക്ക് പോസ്റ്റില് പറഞ്ഞു. കട്ജുവിന്റെ പോസ്റ്റിന് സോഷ്യല് മീഡിയയില് വന് പ്രതികരണമാണ് ലഭിക്കുന്നത്.
കേരള സര്ക്കാര് ആവശ്യപ്പെടുന്ന പക്ഷം നിയമോപദേശം നല്കാനും കട്ജു സന്നദ്ധത പ്രകടിപ്പിച്ചിട്ടുണ്ട്. തെളിവുകള് കൈകാര്യം ചെയ്യുന്നതില് സുപ്രീം കോടതിക്ക് തെറ്റ് പറ്റി. പ്രോസിക്യൂഷന് തെറ്റ് പറ്റിയതായി കരുതുന്നില്ല എന്നും കട്ജു പറഞ്ഞു. സുപ്രീം കോടതി വിധി പരിശോധിക്കണം എന്നാണ് കട്ജുവിന്റെ അഭിപ്രായം. സൗമ്യ വധക്കേസില് ഗോവിന്ദച്ചാമിയുടെ വധശിക്ഷ ഒഴിവാക്കിയ സുപ്രീം കോടതി വിധിക്കെതിരെ പുനപരിശോധന ഹര്ജി നല്കാന് ഒരുങ്ങുകയാണ് കേരള സര്ക്കാര്.