സ്പേഡെക്സ് ദൗത്യം; ട്രെയൽ പൂർത്തിയാക്കിയെന്ന് ഐഎസ്ആർഒ..ഡോകിങ് നീളുന്നു

സ്പേഡെക്സ് ദൗത്യം അവസാനഘട്ടത്തിലേക്ക്. ബഹിരാകാശ പേടകങ്ങൾ തമ്മിലുള്ള അകലം 15 മീറ്ററിൽ നിന്ന് മൂന്ന് മൂറ്ററിലേക്ക് എത്തിക്കാനുള്ള പരീക്ഷണ ശ്രമം വിജയിച്ചതായി ഐഎസ്ആർഒ അറിയിച്ചു. ഇതിന് ശേഷം ഉപഗ്രഹങ്ങൾ സുരക്ഷിത അകലത്തിലേക്ക് മാറ്റിയതായും ഐഎസ്ആർഒ വ്യക്താമക്കി. അതേസമയം കൂടൂതൽ പരിശോധനക്ക് ശേഷം മാത്രമോ ഡോക്കിങ് പരീക്ഷണം നടത്തുകയുള്ളൂവെന്നും ഐഎസ്ആർഒ അറിയിച്ചു.

'രണ്ട് ഉപഗ്രഹങ്ങളായ SDX01 (ചേസർ), SDX02 (ടാർഗെറ്റ്) എന്നിവ 15 മീറ്റർ അകലത്തിലായിരുന്നു. 15 മീറ്റർ വ്യത്യാസത്തിൽ അവ രണ്ടും വ്യക്തമായി കാണാൻ സാധിച്ചിട്ടുണ്ട്, ഒരു ഹാൻഡേഷേക്കൽ നിന്ന് വെറും 50 അടി അകലെ', എന്നായിരുന്നു പരീക്ഷണം തുടങ്ങും മുൻപ് ഐഎസ്ആർഒ എക്സിൽ പങ്കുവെച്ചത്. അതേസമയം രണ്ട് ഉപഗ്രഹങ്ങളേയും ഭൂമിയുടെ ഭ്രമണപഥത്തിൽ വെച്ച് കൂട്ടിയോജിപ്പിക്കുന്ന ഡോക്കിങ് പരീക്ഷണം സംബന്ധിച്ച് യാതൊരു വിവരവും ഇതുവരെ ഐഎസ്ആർഒ അറിയിച്ചിട്ടില്ല.

ഡിസംബർ 30 നാണ് സ്പേഡെക്സ് പരീക്ഷണത്തിനായി രണ്ട് ഉപഗ്രഹങ്ങളും ഐഎസ്ആർഒ വിക്ഷേപിച്ചത്. പിഎസ്എൽവി സി 60 റോക്കറ്റിലായിരുന്നു വിക്ഷേപണം. തുടർന്ന് ജനവരി 7 ന് ഡോകിങ് പരീക്ഷണം നടത്തുമെന്നായിരുന്നു ഐഎസ്ആർഒ ആദ്യം വ്യക്തമാക്കിയത്. എന്നാൽ സങ്കേതിക തടസത്തെ തുടർന്ന് ഡോകിങ് നീട്ടിയതായി അറിയിച്ചു. തുടർന്ന് ജനവരി 9 ന് ഡോകിങ് നടത്തുമെന്ന് അറിയിച്ചെങ്കിലും സാങ്കേതിക തടസം നിലനിൽക്കുന്നുണ്ടെന്ന് ഐഎസ്ആർഒ അറിയിക്കുകയായിരുന്നു. ഉപഗ്രഹങ്ങൾ തമ്മിലുള്ള അകലം കുറക്കാനുള്ള ശ്രമം നടത്തുന്നതിനിടെ രണ്ട് ഉപഗ്രഹങ്ങളും കൂടുതൽ അടുത്തേക്ക് വന്നതാണ് പ്രതിസന്ധി തീർത്തത്.

സ്പേഡ്ക്സ് വിജയകരമായി പൂർത്തിയാക്കുകയെന്നത് ഇന്ത്യയെ സംബന്ധിച്ച് വളരെ പ്രധാനമാണ്. ഭാരതീയ അന്തരിക്ഷ് സ്റ്റേഷൻ (ബിഎഎസ്) സ്ഥാപിക്കുന്നത് ഉൾപ്പെടെയുള്ള ഇന്ത്യയുടെ ബഹിരാകാശ പദ്ധതികൾക്ക് സ്പേഡെക്സിന്റെ വിജയം ഊർജം നൽകും.ബഹിരാകാശത്ത് വെച്ച് രണ്ട് ഉപഗ്രഹങ്ങളെ കൂട്ടിയോജിപ്പിക്കാനും വേർപെടുത്താനുള്ള ഇന്ത്യയുടെ ശ്രമങ്ങൾ വിജയിച്ചാൽ ഈ നേട്ടം കൊയ്ത മൂന്ന് രാജ്യങ്ങളുടെ പട്ടികയിൽ നാലാമനായി ഇന്ത്യയും ഉൾപ്പെടും. ഇതുവരെ യുഎസ്, റഷ്യ, ചൈന എന്നീ രാജ്യങ്ങളാണ് ഈ നേട്ടം കൈവരിച്ചിട്ടുള്ളത്.