വിമാനടിക്കറ്റും ഇനി ഇന്സ്റ്റാള്മെന്റില് ലഭിക്കും
മുംബൈ: ഇനി നിങ്ങള്ക്ക് വിമാനടിക്കറ്റും ഇന്സ്റ്റാള്മെന്റ് വഴി ലഭിക്കും. വളരെ വ്യത്യസ്തമായ പദ്ധതിയുമായാണ് വിമാനക്കമ്പനി യാത്രക്കാരെ ആകര്ഷിക്കാനെത്തുന്നത്. ഇന്സ്റ്റാള്മെന്റില് എന്തും കൈയ്യില് ഒതുക്കാമെന്ന് ചിന്തിക്കുന്ന ആളുകള്ക്ക് ഇതൊരു സന്തോഷവാര്ത്ത കൂടിയാണ്.
വിമാനടിക്കറ്റിന് ഒരുപാട് പണം വേണ്ടേ എന്ന് ചിന്തിക്കുന്നവര്ക്ക് ഇനി പേടിക്കാനില്ല. മാസത്തവണകളായി വിമാന ടിക്കറ്റിന്റെ പണമടക്കാം. സ്പൈസ് ജെറ്റാണ് ഇങ്ങനെയൊരു പദ്ധതിയുമായി മുന്നോട്ട് വന്നിരിക്കുന്നത്.
മൂന്ന് മാസം, ആറ് മാസം, ഒമ്പത് മാസം, ഒരു വര്ഷം എന്നീ കാലാവധികളില് പണമടച്ചു തീര്ക്കാവുന്ന പദ്ധതികളാണ് അവതരിപ്പിച്ചത്. ബുക്ക് നൗ പേ ലേറ്റര് എന്നാണ് ഈ പദ്ധതിയുടെ പേര്. ആക്സിസ് ബാങ്ക്, എച്ച്എസ്ബിസി ബാങ്ക്, കോട്ടക് ബാങ്ക്, സ്റ്റാന്റേര്ഡ് ചാര്ട്ടേര്ഡ് ബാങ്ക് എന്നിവയുടെ ക്രെഡിറ്റ് കാര്ഡുകള് നിങ്ങളുടെ കൈവശമുണ്ടെങ്കില് പദ്ധതി വഴി ടിക്കറ്റെടുക്കാം.
മറ്റ് ബാങ്കുകളെയും വൈകാതെ പദ്ധതിയില് ഉള്പ്പെടുത്തുമെന്നും അധികൃതര് അറിയിച്ചിട്ടുണ്ട്. പലിശനിരക്കുകളും കുറവായിരിക്കും എന്നതാണ് മറ്റൊരു പ്രത്യേകത. 12 മുതല് 14 ശതമാനം വരെയായിരിക്കും ടിക്കറ്റുകള്ക്ക് പലിശ ഈടാക്കുക.