വീട്ടില്‍ നോക്കുന്നിടത്തെല്ലാം എട്ടുകാലി വലകളാണോ? അവയെ പൂര്‍ണമായി ഒഴിവാക്കാം: ഈ വഴികളിലൂടെ

വീട്ടിലെ എട്ടുകാലി വലകള്‍ വീട്ടമ്മമാര്‍ക്ക് വലിയ തലവേദന സൃഷ്ടിക്കാറുണ്ട്. ചിലര്‍ക്ക് ഇത് വൃത്തിയാക്കാന്‍ പോലും വലിയ പേടിയാണ്. ചുവരുകളിലും മേല്‍ക്കൂരയുടെ മൂലകളിലും ഇടയ്ക്കിടെ പ്രത്യക്ഷപ്പെടുന്ന എട്ടുകാലി വലകള്‍ താമസിക്കുന്നവര്‍ക്കും അതിഥികള്‍ക്കും അരോചകമായി മാറാറുണ്ട്. ഇന്ന് വൃത്തിയാക്കിയാലും നാളെ വീണ്ടും അതേ സ്ഥലത്ത് വല പ്രത്യക്ഷപ്പെടും. സുരക്ഷിതമായ താമസസ്ഥലം, ചൂട്, ഭക്ഷണം എന്നിവ തേടിയാണ് എട്ടുകാലികള്‍ പ്രധാനമായും വീടിനുള്ളിലേക്ക് പ്രവേശിക്കുന്നത്.

പ്രത്യേകിച്ച് കൊതുക് പോലുള്ള പ്രാണികളെയാണ് ഇവ പിടികൂടി ഭക്ഷിക്കുന്നത്. വീടിന്റെ പല മൂലകളിലും വല കെട്ടി വീടിന്റെ ഭംഗി തന്നെ നശിപ്പിക്കുന്നതില്‍ ചിലന്തികള്‍ക്ക് വലിയ പങ്കുണ്ട്. ശത്രുക്കളില്‍ നിന്ന് രക്ഷ നേടാനും ഇരയെ പിടിക്കാനുമാണ് എട്ടുകാലികള്‍ പ്രധാനമായും വല നെയ്യുന്നത്.

പൊടിയും അഴുക്കും നിറഞ്ഞ സാഹചര്യങ്ങളും വെളിച്ചം കുറഞ്ഞ ശാന്തമായ ഇടങ്ങളുമാണ് എട്ടുകാലികള്‍ക്ക് ഏറ്റവും പ്രിയപ്പെട്ടത്. വീടിനുള്ളിലെ വായുവിലുള്ള പൊടിപടലങ്ങളെ പിടിച്ചെടുക്കാനുള്ള ശേഷി ഇത്തരം ചിലന്തി വലകള്‍ക്കുണ്ടെന്ന് പഠനങ്ങള്‍ വ്യക്തമാക്കുന്നു. അതുകൊണ്ട് തന്നെ കൃത്യമായ ഇടവേളകളില്‍ വൃത്തിയാക്കാത്ത വീടുകളില്‍ ഇവയുടെ ശല്യം വര്‍ധിക്കും. ഉപയോഗശൂന്യമായ സാധനങ്ങള്‍ കുത്തിനിറച്ച മുറികളും ഇരുളടഞ്ഞ മൂലകളും ഇവയ്ക്ക് താവളമൊരുക്കാന്‍ ഏറ്റവും അനുയോജ്യമായ ഇടങ്ങളാണ്.

എട്ടുകാലി വലകളെ പ്രതിരോധിക്കാനുള്ള ഏറ്റവും നല്ല മാര്‍ഗം വീട് എപ്പോഴും വൃത്തിയായി സൂക്ഷിക്കുക എന്നതാണ്. മേല്‍ക്കൂരയുടെ മൂലകള്‍, ഫര്‍ണിച്ചറുകള്‍ക്ക് പിന്നിലെ ഭാഗങ്ങള്‍, കട്ടിലിനടിയിലെ സ്ഥലങ്ങള്‍, അലമാരകള്‍ക്ക് താഴെ എന്നിവിടങ്ങളില്‍ ശുചീകരണ വേളയില്‍ പ്രത്യേകം ശ്രദ്ധ കേന്ദ്രീകരിക്കണം. വാക്വം ക്ലീനര്‍ ഉപയോഗിച്ച് ഇത്തരം ഇടങ്ങള്‍ വൃത്തിയാക്കുന്നത് എട്ടുകാലികളുടെ മുട്ടകളും വലകളും പൂര്‍ണമായി നീക്കം ചെയ്യാനും അവയുടെ ആവാസവ്യവസ്ഥയെ തകര്‍ക്കാനും സഹായിക്കും.

ഇതുകൂടാതെ, ചുവരുകളിലെയും ജനലുകളിലെയും ചെറിയ വിള്ളലുകള്‍ സിമന്റോ മറ്റ് വസ്തുക്കളോ ഉപയോഗിച്ച് അടയ്ക്കുന്നത് വഴി ചിലന്തികള്‍ പുറത്തു നിന്ന് വീടിനുള്ളിലേക്ക് പ്രവേശിക്കുന്നത് തടയാം. വീടിനുള്ളിലെ മറ്റ് പ്രാണികളെ ഒഴിവാക്കുന്നതിലൂടെ എട്ടുകാലികള്‍ക്ക് ലഭിക്കുന്ന ഭക്ഷണത്തിന്റെ അളവ് കുറയ്ക്കാനും അതുവഴി അവയെ അകറ്റാനും സാധിക്കും.

രാസവസ്തുക്കള്‍ക്ക് പകരം വീട്ടില്‍ തന്നെയുള്ള പ്രകൃതിദത്തമായ മാര്‍ഗങ്ങള്‍ ഉപയോഗിച്ചും ഈ പ്രശ്‌നം പരിഹരിക്കാവുന്നതാണ്. എട്ടുകാലികള്‍ക്ക് തീവ്രമായ ഗന്ധങ്ങള്‍ ഒട്ടും ഇഷ്ടമല്ലാത്തതിനാല്‍ പെപ്പര്‍മിന്റ് ഓയില്‍ വെള്ളത്തില്‍ കലര്‍ത്തി സ്‌പ്രേ ചെയ്യുന്നത് വളരെ ഫലപ്രദമാണ്. അതുപോലെ വിനാഗിരി ലായനിയോ നാരങ്ങയുടെ തൊലിയോ ജനലുകള്‍ക്കും വാതിലുകള്‍ക്കും സമീപം വെക്കുന്നത് ഇവയെ അകറ്റാന്‍ സഹായിക്കും. ആഴ്ചയിലൊരിക്കലെങ്കിലും വീടിന്റെ മൂലകള്‍ വൃത്തിയാക്കുകയും മുറികളില്‍ നല്ല രീതിയില്‍ വെളിച്ചവും വായുസഞ്ചാരവും ഉറപ്പാക്കുകയും ചെയ്യുന്നത് ചിലന്തി വലകള്‍ കുറയ്ക്കാന്‍ സഹായിക്കും. മിക്ക ചിലന്തികളും ഉപദ്രവകാരികളല്ല. കൃത്യമായ ശുചിത്വ ശീലങ്ങളിലൂടെ ഇവയുടെ ശല്യം പൂര്‍ണമായും നിയന്ത്രിക്കാന്‍ സാധിക്കും.