നരേന്ദ്രമോഡിക്ക് ശ്രീശ്രീ രവിശങ്കറിന്റെ പിന്തുണ
ചന്ദ്രപൂര്: ബി ജെ പിയുടെ പ്രധാനമന്ത്രി സ്ഥാനാര്ഥി നരേന്ദ്രമോഡിക്ക് ആര്ട്സ് ഓഫ് ലിവിംഗ് ആചാര്യന് ശ്രീ ശ്രീ രവിശങ്കറിന്റെ പിന്തുണ. വളരെ നല്ല മനുഷ്യനാണ് മോഡി എന്നായിരുന്നു ഗുജറാത്ത് മുഖ്യമന്ത്രിയെക്കുറിച്ച് രവിശങ്കറിന്റെ കമന്റ്. എന്നാല് രാഹുല് ഗാന്ധിയെക്കുറിച്ച് തനിക്ക് അഭിപ്രായമില്ല എന്നും അദ്ദേഹം പറഞ്ഞു. ഈ ആഴ്ച തന്നെ ബോളിവുഡ് താരം സല്മാനും ഖാനും മോഡിയെ പുകഴ്ത്തി രംഗത്തുവന്നിരുന്നു.
ഒന്ന് രണ്ട് തവണ നരേന്ദ്രമോഡിയുമായി അടുത്ത് ഇടപഴകിയിട്ടുണ്ട്. വളരെ നല്ല മനുഷ്യനാണ് അദ്ദേഹം. രാഹുല് ഗാന്ധിയെക്കുറിച്ച് എനിക്കൊന്നും അറിയില്ല. ഞാന് അദ്ദഹവുമായി അടുത്ത് ഇടപഴകിയിട്ടില്ല, അതുകൊണ്ട് തന്നെ രാഹുലിനെക്കുറിച്ച് അഭിപ്രായവുമില്ല - ഭാവി പ്രധാനമന്ത്രിമാര് എന്ന് കരുതപ്പെടുന്ന ഇരുനേതാക്കളെയും കുറിച്ചുള്ള അഭിപ്രായം ചോദിച്ചപ്പോഴായിരുന്നു രവിശങ്കറിന്റെ ഈ മറുപടി.
വ്യക്തമായ ഭൂരിപക്ഷത്തോടെ ഏതെങ്കിലും ഒരു പാര്ട്ടി ഭരിക്കുന്നതാണ് രാജ്യത്തിന് നല്ലത്. കൂട്ടുകക്ഷി ഭരണം പരാജയമായിരിക്കും എന്ന് കഴിഞ്ഞ പത്ത് വര്ഷമായി നമ്മള് കാണുന്നതാണ് - യു പി എ സര്ക്കാരിന്റെ ഭരണപരാജയത്തെ പരാമര്ശിച്ചുകൊണ്ട് ശ്രീ ശ്രീ രവിശങ്കര് പറഞ്ഞു. നല്ല ഇന്ത്യയ്ക്ക് വേണ്ടി വോട്ട് ചെയ്യുക എന്ന് ആര്ട്ട് ഓഫ് ലിവിംഗ് ഫൗണ്ടേഷന് ക്യാംപെയ്ന് നടത്തും.
രാജ്യത്തെ രാഷ്ട്രീയ പാര്ട്ടികള്ക്ക് ഒരു മറുമരുന്നാണ് ആം ആദ്മി പാര്ട്ടി. എന്നാല് അവര്ക്ക് ഭരണപരിചയം ഇല്ല. അഴിമതിക്കെതിരായ ആം ആദ്മി പാര്ട്ടിയുടെ നിലപാടുകള് സത്യസന്ധവും സ്വാഗതാര്ഹവുമാണ്. എന്നാല് പരിചയസമ്പത്തില്ല എന്നത് അവര്ക്ക് തിരിച്ചടിയാണ്. ലോക്സഭ തിരഞ്ഞെടുപ്പില് നൂറ് ശതമാനം പോളിംഗ് ഉറപ്പുവരുത്താന് വേണ്ടി ആര്ട്ട് ഓഫ് ലിവിംഗ് ഫൗണ്ടേഷന് ക്യാംപെയ്ന് നടത്തുമെന്നും അദ്ദേഹം പറഞ്ഞു.