അംബാനിയുടെ അക്കൗണ്ട് പെണ്കുട്ടി ഹാക്ക് ചെയ്തു
മുംബൈ: തീക്കട്ടയില് ഉറുമ്പരിച്ചു എന്നൊക്കെ പറഞ്ഞപോലെ വ്യവസായ ഭീമന് അനില് അംബാനിയുടെ ഇന്കം ടാക്സ് റിട്ടേണ്സ് അക്കൗണ്ട് ഹാക്ക് ചെയ്തു. ഹൈദരാബാദില് നിന്നുള്ള ഒരു സി എ വിദ്യാര്ഥിനിയാണ് അംബാനിക്ക് പണി കൊടുത്തത്. അനില് അംബാനിയുടെ ടാക്സ് വിവരങ്ങള് കിട്ടാന് വേണ്ടിയാണ് അക്കൗണ്ട് ഹാക്ക് ചെയ്തത് എന്നാണ് റിപ്പോര്ട്ട്.
ഹൈദരാബാദ് സ്വദേശിയായ 21 കാരിക്കെതിരെ ഐ ടി ആക്ട് പ്രകാരം പോലീസ് കേസെടുത്തു. അംബാനിയുടെ വരുമാനവും ടാക്സടച്ചതിന്റെ വിവരങ്ങളും മറ്റും അറിയാന് വേണ്ടിയാണ് പെണ്കുട്ടി അക്കൗണ്ട് ഹാക്ക് ചെയ്തത് എന്ന് പോലീസ് പറഞ്ഞു.
മുംബൈയില് നിന്നുള്ള ഒരു കമ്പനിയാണ് അനില് അംബാനിയുടെ ടാക്സ് വിവരങ്ങള് ഫയല് ചെയ്തിരുന്നത്. ജൂണ് 26 നും ജൂലൈ 12 നും പാസ്വേര്ഡ് മാറ്റിയതായി ഇവര്ക്ക് മെയില് ലഭിച്ചു. ഇതേത്തുടര്ന്നുണ്ടായ അന്വേഷണത്തിലാണ് അക്കൗണ്ട് ഹാക്ക് ചെയ്തതായി മനസിലായത്.
സംശയത്തെത്തുടര്ന്ന് മുംബൈ ജോയിന്റ് പോലീസ് കമ്മീഷണര് ഹിമാന്ഷു റോയി അന്വേഷണം നടത്താന് സൈബര് സെല് ഇന്സ്പെക്ടര് മുകുന്ദ് പവാറിന് നിര്ദ്ദേശം നല്കുകയായിരുന്നു. സെപ്തബര് 7നാണ് കേസ് രജിസ്റ്റര് ചെയ്തത്.
പെണ്കുട്ടിക്കെതിരെ എല്ലാവിധ തെളിവുകളും ലഭിച്ചതായി പോലീസ് പറഞ്ഞു. ഇവരെ ഉടന്തന്നെ അറസ്റ്റ് ചെയ്യുമെന്നാണ് റിപ്പോര്ട്ട്.