വിവാഹവാഗ്ദാനം പാലിച്ചില്ല: അധ്യാപകന്റെ മുഖത്ത് വിദ്യാര്‍ത്ഥി ആസിഡ് ഒഴിച്ചു

By Aswathi

Published: Sunday, December 21, 2014, 9:23 [IST]

ഗുണ്ടൂര്‍: ആന്ധ്രാപ്രദേശിലെ ഗുണ്ടൂരില്‍ അധ്യാപകന്റെ മുഖത്ത് ആസിഡ് ഒഴിച്ച് വിദ്യാര്‍ത്ഥിയുടെ പ്രതിഷേധം. വിവാഹ വാഗ്ദാനം നല്‍കി പറ്റിച്ചതിനെ തുടര്‍ന്നാണത്രെ ബിരുദ വിദ്യാര്‍ത്ഥിയായ പെണ്‍കുട്ടി അധ്യാപകന്റെ മുഖത്ത് ആസിഡ് ആക്രണണം നടത്തിയത്.

ഗുണ്ടൂര്‍ നളപ്പാടുള്ള ഗവണ്‍മെന്റ് പോളിടെക്‌നിക്ക് കോളേജിലാണ് സംഭവം. കോളേജിലെ ലക്ചറായ വെങ്കട്ട രാമണനാണ് ആക്രമണത്തിനിരയായത്. ഗുരുതരമായി പരിക്കേറ്റ ഇയാളെ ആശുപത്രിയില്‍ പ്രവേശിപ്പിച്ചു.

കോളേജ് മെയിന്‍ ഗേറ്റിനടുത്ത് കാത്ത് നിന്നാണ് പെണ്‍കുട്ടി ആസിഡ് ആക്രമണം നടത്തിയത്. ആളെ തിരിച്ചറിയാതിരിക്കാന്‍ ബുര്‍ഖ ധരിച്ചാണ് പെണ്‍കുട്ടി എത്തിയത്. അധ്യാപകന്റെ മുഖത്തും കൈകളിലും സാരമായ പരിക്കേറ്റിട്ടുണ്ട്. പെണ്‍കുട്ടിയുടെ ദേഹത്തും ആസിഡ് തെറിച്ചു. ഇരുവരെയും ആശുപത്രിയില്‍ പ്രവേശിപ്പിച്ചിരിക്കുകയാണെന്ന് പൊലീസ് അറിയിച്ചു.

നരസരപേട്ടയിലെ കോളേജില്‍ വെങ്കട്ട രാമണരുടെ വിദ്യാര്‍ത്ഥിയായിരുന്നു പെണ്‍കുട്ടി. ഇവിടെ വച്ച് പെണ്‍കുട്ടിയ്ക്ക് വിവാഹ വാഗ്ദാനം നല്‍കിയെങ്കിലും പിന്നീടിയാള്‍ മറ്റൊരു പെണ്‍കുട്ടിയെ വിവാഹം കഴിക്കുകയായിരുന്നു. പെണ്‍കുട്ടിക്കെതിരെ കേസെടുത്തിട്ടുണ്ടെന്ന് പൊലീസ് അറിയിച്ചു.

Published On December 21, 2014