സിപിഐ ജനറല് സെക്രട്ടറിയായി സുധാകര് റെഡ്ഡി തുടരും
പുതുച്ചേരി: സിപിഐ ജനറല് സെക്രട്ടറിയായി സുധാകര് റെഡ്ഡി തുടരും. പുതുച്ചേരിയില് പാര്ട്ടി കോണ്ഗ്രസ് വേദിയില് നടക്കുന്ന ദേശീയ കൗണ്സില് യോഗത്തിലാണ് സുധാകര് റെഡ്ഡിയെ ജനറല് സെക്രട്ടറിയായി വീണ്ടും തിരഞ്ഞെടുത്തത്. രണ്ടാം തവണയാണ് സുദാകര് റെഡ്ഡി സിപിഐ ജനറല് സെക്രട്ടറിയാകുന്നത്. ഗുരുദാസ് ദാസ് ഗുപ്തയെ ഡെപ്യൂട്ടി ജനറല് സെക്രട്ടറിയായി തിരഞ്ഞെടുത്തു.
പന്ന്യന് രവീന്ദ്രന് കേന്ദ്ര സെക്രട്ടറിയേറ്റില് തുടരും. ബിനോയ് വിശ്വം പുതുതായി കേന്ദ്ര നിര്വാഹക സമിതിയില് അംഗമായി. സിപിഐ ദേശീയ കൗണ്സിലില് കേരളത്തില് നിന്ന് മൂന്ന് അംഗങ്ങളെക്കൂടി ഉള്പ്പെടുത്തി. കെ പ്രകാശ് ബാബു, സിഎന് ജയദേവന്, ടിവി ബാലന് എന്നിവരെയാണ് ദേശീയ കൗണ്സിലില് അംഗങ്ങളാക്കിയത്. അതേസമയം സ്ഥാനാര്ഥി വിവാദത്തില് അകപ്പെട്ട സി ദിവാകരനെ എക്സിക്യൂട്ടീവില് ഉള്പ്പെടുത്തിയിട്ടില്ല.
ഇന്ത്യന് കമ്യൂണിസ്റ്റ് പ്രസ്ഥാനത്തിന്റെ ആദ്യതലമുറ നേതാക്കളില് ഒരാളാണ ്സുധാകര് റെഡ്ഡി. വിദ്യാര്ഥിയായിരിയ്ക്കുമ്പോള് മുതല് പ്രക്ഷോഭങ്ങളില് മുന് നിരയില് ഉണ്ടായിരുന്നു അദ്ദേഹം. തെലങ്കാനയിലെ നല്ഗൊണ്ടയില് നിന്നുള്ള പാര്ലമെന്റ് അംഗവുമാണ് സുധാകര് റെഡ്ഡി. ഡെപ്യൂട്ടി ജനറല് സെക്രട്ടറിയായി തിരഞ്ഞെടുക്കപ്പെട്ട ഗുരുദാസ് ദാസ് ഗുപ്ത പശ്ചിമ ബംഗാളില് നിന്നുള്ള നേതാവാണ്.