സുനന്ദയുടെ മരണം: തൂരൂരിനെ ചോദ്യം ചെയ്തു... 40 ചോദ്യങ്ങള്‍

ദില്ലി: സുനന്ദ പുഷ്‌കറിന്റെ കൊലപാതകവുമായി ബന്ധപ്പെട്ട് ശശി തരൂരിനെ ദില്ലി പോലീസിന്റെ പ്രത്യേക അന്വേഷണ സംഘം ചോദ്യം ചോദ്യം ചെയ്തു. ജനുവരി 19 ന് രാത്രിയാണ് തരൂര്‍ ദില്ലി പോലീസിന് മുന്നില്‍ ഹാജരായത്.

ശശി തരൂരിനോട് പ്രത്യേക അന്വേഷണ സംഘം 40 ചോദ്യങ്ങള്‍ ചോദിച്ചതായാണ് വിവരം. സുനന്ദയുടെ മരണത്തില്‍ എന്തെങ്കിലും അസ്വാഭാവികതയുണ്ടെന്ന് കരുതുന്നില്ലെന്നാണത്രെ തരൂര്‍ അന്വേഷണ സംഘത്തോട് പറഞ്ഞത്.

സുനന്ദയുടെ മരണം കൊലപാതകമാണെന്ന് ദില്ലി പോലീസ് കണ്ടെത്തിയ വാര്‍ത്ത പുറത്ത് വന്നപ്പോഴും തരൂരിന്റെ പ്രതികരണം ഇങ്ങനെ തന്നെ ആയിരുന്നു. സ്വാഭാവിക മരണം ആയിരിക്കാം എന്നാണ് ഇപ്പോള്‍ ചോദ്യം ചെയ്യലിലും തരൂര്‍ പറഞ്ഞിരിക്കുന്നത്.

തരൂരിനെ വീണ്ടും ചോദ്യം ചെയ്‌തേക്കുമെന്നാണ് അന്വേഷണ സംഘത്തില്‍ നിന്ന് ലഭിക്കുന്ന വിവരം. രണ്ട് തവണയെങ്കിലും ഇനിയും ചോദ്യം ചെയ്യേണ്ടിവരുമെന്നാണ് വാര്‍ത്തകള്‍ . ചോദ്യം ചെയ്യലിനോട് തരൂര്‍ നന്നായി സഹകരിച്ചു എന്നാണ് റിപ്പോര്‍ട്ട്. ചോദ്യങ്ങളോട് ശാന്തമായാണ് പ്രതികരിച്ചത്.

സുനന്ദക്ക് ശത്രുക്കള്‍ ആരെങ്കിലും ഉണ്ടായിരുന്നോ, ഐപിഎല്ലുമായി ബന്ധപ്പെട്ട് എന്തെങ്കിലും പ്രശ്‌നങ്ങള്‍ ഉണ്ടയിരുന്നോ, സുനന്ദയുടെ മാനസിക നില എങ്ങനെയായിരുന്നു തുടങ്ങിയ ചോദ്യങ്ങള്‍ തരൂരിനോട് അന്വേഷണ സംഘം ചോദിച്ചതായാണ് റിപ്പോര്‍ട്ട്.

അന്വേഷണ സംഘത്തോട് എല്ലാ രീതിയിലും സഹകരിക്കാമെന്ന് തരൂര്‍ ഉറപ്പ് നല്‍കിയിട്ടുണ്ടത്രെ. പോലീസ് ആവശ്യപ്പെടുമ്പോള്‍ ഹാജരാകാമെന്നും അദ്ദേഹം ഉറപ്പ് നല്‍കിയിട്ടുണ്ട്.

English summary

Sunanda Pushkar murder case: Shashi Tharoor gets 40 questions from SIT