തമിഴ്നാട് വിറയ്ക്കുന്നു...ഇന്ന് രോഗം സ്ഥിരീകരിച്ചത് 31 പേര്ക്ക്, ആകെ രോഗബാധിതര് 1200 കടന്നു
ചെന്നൈ: തമിഴ്നാട്ടില് കൊറോണ ബാധിക്കുന്നവരുടെ എണ്ണം ദിവസേന വര്ദ്ധിക്കുന്നു. ഇന്ന് മാത്രം തമിഴ്നാട്ടില് രോഗം സ്ഥിരീകരിച്ചവരുടെ എണ്ണം 31 ആയി. ഇതോടെ ആകെ രോഗം സ്ഥിരീകരിച്ചവരുടെ എണ്ണം 1204 ആയി. ഇന്ന് രോഗം സ്ഥിരീകരിച്ച 21 പേര്ക്കും ഒരേ കേന്ദ്രത്തില് നിന്നാണ് രോഗം ബാധിച്ചതെന്ന് സംസ്ഥാന ആരോഗ്യവകുപ്പ് സെക്രട്ടറി ബീലാ രാജേഷ് വ്യക്തമാക്കി. അതേസമയം, ഇതുവരെ സംസ്ഥാനത്ത് 81 പേരെ രോഗം ഭേദമായി ആശുപത്രി വിട്ടിട്ടുണ്ട്. 12 പേരാണ് തമിഴ്നാട്ടില് നിന്ന് മരിച്ചത്.
ഇതിനിടെ കര്ണാടകയിലും പുതിയ കേസുകള് റിപ്പോര്ട്ട് ചെയ്തു. ഇന്ന് മാത്രം 13 കേസുകളാണ് റിപ്പോര്ട്ട് ചെയ്തിരിക്കുന്നത്. സംസ്ഥാനത്ത് രോഗ ബാധിതരുടെ എണ്ണം 260ആയി. പത്ത് പേരാണ് കര്ണാടകയില് നിന്ന് മരിച്ചത്. 71 പേര് രോഗമുക്തി നേടി ആശുപത്രി വിട്ടെന്നും സംസ്ഥാന ആരോഗ്യവകുപ്പ് അറിയിച്ചു.
അതേസമയം, കേരളത്തില് ഇന്ന് 8 പേര്ക്ക് കോവിഡ്-19 സ്ഥിരീകരിച്ചു. കണ്ണൂര് ജില്ലയില് നിന്നുള്ള 4 പേര്ക്കും കോഴിക്കോട് ജില്ലയില് നിന്നുള്ള 3 പേര്ക്കും കാസര്ഗോഡ് ജില്ലയില് നിന്നുള്ള ഒരാള്ക്കുമാണ് രോഗം സ്ഥിരീകരിച്ചത്. ഇതില് 5 പേര് വിദേശത്ത് നിന്നും വന്നവരാണ്. 3 പേര്ക്ക് സമ്പര്ക്കത്തിലൂടെയാണ് രോഗം ബാധിച്ചത്. കണ്ണൂര് ജില്ലയിലെ 3 പേരും കോഴിക്കോട്, കാസര്ഗോഡ് ജില്ലകളിലെ ഓരോരുത്തരുമാണ് വിദേശത്ത് നിന്നും വന്നവര്. കോഴിക്കോട് ജില്ലയിലെ രണ്ടുപേര്ക്കും കണ്ണൂര് ജില്ലയിലെ ഒരാള്ക്കും സമ്പര്ക്കത്തിലൂടെയാണ് രോഗം ബാധിച്ചത്.
കോവിഡ് 19 ബാധിച്ച 13 പേര് കൂടി ഇന്ന് രോഗമുക്തി നേടി. കാസര്ഗോഡ് ജില്ലയില് നിന്നുള്ള 6 (കണ്ണൂര് ജില്ലയില് ചികിത്സയിലായിരുന്ന 4 പേര്) പേരുടെയും എറണാകുളം, പാലക്കാട് ജില്ലകളില് നിന്നുള്ള 2 പേരുടെ വീതവും, കൊല്ലം, തൃശൂര്, മലപ്പുറം ജില്ലകളില് നിന്നുള്ള ഓരോരുത്തരുടെ വീതവും പരിശോധനാ ഫലമാണ് നെഗറ്റീവ് ആയത്. ഇതോടെ നിലവില് 173 പേരാണ് സംസ്ഥാനത്തെ വിവിധ ആശുപത്രികളില് ചികിത്സയിലുള്ളത്. 211 പേരാണ് ഇതുവരെ കോവിഡില് നിന്നും രോഗമുക്തി നേടിയത്.
സംസ്ഥാനത്തെ വിവിധ ജില്ലകളിലായി 1,07,075 പേര് നിരീക്ഷണത്തിലാണ്. ഇവരില് 1,06,511 പേര് വീടുകളിലും 564 പേര് ആശുപത്രികളിലും നിരീക്ഷണത്തിലാണ്. 81 പേരെയാണ് ഇന്ന് ആശുപത്രിയില് പ്രവേശിപ്പിച്ചത്. രോഗലക്ഷണങ്ങള് ഉള്ള 16,235 വ്യക്തികളുടെ സാമ്പിള് പരിശോധനയ്ക്ക് അയച്ചിട്ടുണ്ട്. ഇതില് ലഭ്യമായ 15, 488 സാമ്പിളുകളുടെ പരിശോധനാ ഫലം നെഗറ്റിവ് ആണ്.
Click it and Unblock the Notifications
Sign in with Google