തമിഴ്നാട് 'ഒറ്റയ്ക്ക്' പിടിച്ചെടുത്ത് ഡിഎംകെ..ഇനി സ്റ്റാലിൻ യുഗം.. 75 ൽ ഒതുങ്ങി അണ്ണാഡിഎംകെ..ബിജെപിക്ക് 4

ചെന്നൈ; പോരാട്ടത്തിനൊടുവിൽ തമിഴ്നാട്ടിൽ എംകെ സ്റ്റാലിൻ അധികാരത്തിലേക്ക്. ഡിഎംകെ നേതൃത്വം നൽകുന്ന മുന്നണിക്ക് 159 സീറ്റുകളിലാണ് വിജയം.125 സീറ്റ് നേടിയ ഡിഎംകെ തനിച്ച് ഭരിക്കാനുള്ള ഭൂരിപക്ഷം സ്വന്തമാക്കി. 234 സീറ്റുള്ള നിയമസഭയിൽ കേവല ഭൂരിപക്ഷത്തിന് 118 സീറ്റുകളാണ് വേണ്ടത്.

ഡിഎംകെ മുന്നണിയിൽ കോൺഗ്രസിന് 18 സീറ്റുകളും, സിപിഎം-2, സിപിഐ 2, വിടുതലൈ ചിരുതൈഗൾ കച്ചി-4 (വിസികെ),മറുമലർച്ചി ദ്രാവിഡ മുന്നേറ്റ കഴകം (എംഡിഎംകെ)-4, മറ്റ് പാർട്ടികൾ 4 എന്നിങ്ങനെയാണ് സീറ്റുകൾ. അണ്ണാ ഡിഎംകെയുടെ നേതൃത്വത്തിലുള്ള മുന്നണിക്ക് കനത്ത തിരിച്ചടിയാണ് നേരിടേണ്ടി വന്നത്. 75 സീീറ്റുകളാണ് സഖ്യം നേടിയത്. എഡിഎംകെയ്ക്ക് തനിച്ച് 65 സീറ്റുകളാണ് ലഭിച്ചത്. ഇക്കുറി 20 സീറ്റുകൾ വരെ തമിഴ്നാട്ടിൽ നേടുമെന്ന് പ്രഖ്യാപിച്ച ബിജെപിക്ക് നിലംതൊടാൻ കഴിഞ്ഞില്ല. വെറും നാല് സീറ്റുകളാണ് വിജയം. മറ്റ് പാർട്ടികൾക്ക് 1 സീറ്റും.74 സീറ്റുകളിലെ ഫലമായിരുന്നു തിരഞ്ഞെടുപ്പ് കമ്മീഷൻ പ്രഖ്യാപിച്ചത്. ഇതിൽ വിരളിമലൈ മണ്ഡലത്തിലെ ഫലം ഔദ്യോഗികമായി പ്രഖ്യാപിച്ചിരുന്നില്ല. രാത്രി ഏറെ വൈകിയാണ് ഇവിടെ ഫലം വന്നത്. എഡിഎംകെയാണ് മണ്ഡലത്തിൽ വിജയിച്ചത്

പത്ത് വർഷത്തെ ഇടവേളയ്‌ക്ക് ശേഷമാണ് ഡിഎംകെ അധികാരത്തിൽ എത്തുന്നത്. 1996 ന് ശേഷം ആദ്യമായി ഒറ്റയ്ക്കു കേവല ഭൂരിപക്ഷം എന്ന കടമ്പ കൂടിയാണ് ഡിഎംകെ മറികടന്നത്. എംകെ സ്റ്റാലിൻ കൊളത്തൂരിൽ ഹാട്രിക് വിജയം കരസ്ഥമാക്കി. അണ്ണാഡിഎംകെ നേതാവും നിലവിലെ മുഖ്യമന്ത്രിയുമായ എടപ്പാടി പളനിസ്വാമി,ഉപമുഖ്യമന്ത്രി ഒ പനീർശെൽവം എന്നിവരും മികച്ച വിജയം സ്വന്തമാക്കി.

അതേസമയം കോയമ്പത്തൂര്‍ സൗത്തില്‍ അവസാന നിമിഷം വരെ പൊരുതിയെങ്കിലും വിജയം കൊയ്യാൻ നടൻ കമൽഹാസന് സാധിച്ചിരുന്നു. തമിഴ്നാട്ടിൽ വലിയ അട്ടിമറി ഉണ്ടാക്കുമെന്ന് വിലയിരുത്തപ്പെട്ടിരുന്ന ടിടിവി ദിനകരനും കൂട്ടർക്കും യാതൊരു മുന്നേറ്റവും ഉണ്ടാക്കാൻ സാധിച്ചില്ല.

English summary

Tamilnadu Assembly Election Results 2021; DMK won 159 Seats