പെന്ഷന് 2000 രൂപയാക്കും, 10 ലക്ഷം പുതിയ വീടുകള്; ഡിഎംകെയുടെ പ്രകടനപത്രിക പുറത്ത്
ചെന്നൈ: തമിഴ്നാട് നിയമസഭാ തിരഞ്ഞെടുപ്പിന് മുന്നോടിയായി പ്രകടന പത്രിക പുറത്തിറക്കി ഡിഎംകെ. വോട്ടര്മാര്ക്ക് വമ്പന് വാഗ്ദാനങ്ങളാണ് ഡിഎംകെ പ്രകടന പത്രികയില് മുന്നോട്ട് വെച്ചിരിക്കുന്നത്. പാര്ട്ടി അധ്യക്ഷനും മുഖ്യമന്ത്രിയുമായ എം കെ സ്റ്റാലിന് ആണ് ചെന്നൈയിലെ അണ്ണാ അറിവാലയത്തില് വെച്ച് പ്രകടന പത്രിക പുറത്തിറക്കിയത്. 164 പേരുടെ സ്ഥാനാര്ത്ഥി പട്ടിക സ്റ്റാലിന് കഴിഞ്ഞ ദിവസം പുറത്തുവിട്ടിരുന്നു.
ഇതിന് പിന്നാലെയാണ് ഡിഎംകെയുടെ പ്രകടനപത്രിക പ്രകാശനം ചെയ്തത്. ജനങ്ങളെ ആകര്ഷിക്കുന്ന സുപ്രധാന പദ്ധതികളും പുതിയ പ്രഖ്യാപനങ്ങളും ആണ് പ്രകടനപത്രികയില് ഉള്ക്കൊള്ളിച്ചിരിക്കുന്നത്. സ്ത്രീകളുടെ സാമ്പത്തിക ഉന്നമനം, സ്വയംതൊഴില് സാധ്യതകള്, സാമൂഹിക സുരക്ഷ എന്നിവ ഉറപ്പാക്കാന് ലക്ഷ്യമിടുന്ന 'മഹിളാര് ഉറിമൈ തൊഗൈ' പദ്ധതിയാണ് പ്രകടനപത്രികയിലെ പ്രധാന ആകര്ഷണം.
സ്ത്രീകളുടെ ഭരണപരമായ ഭാരം കുറയ്ക്കാന് ഈ നീക്കം സഹായിക്കുമെന്നാണ് രാഷ്ട്രീയ വൃത്തങ്ങളുടെ വിലയിരുത്തല്. എല്ലാ സ്ത്രീകള്ക്കും 2000 രൂപ ധനസഹായം, 1.15 ലക്ഷം വിദ്യാര്ത്ഥികള്ക്ക് പ്രയോജനകരമാകുന്ന എട്ടാം ക്ലാസ് വരെ സൗജന്യ പ്രഭാത ഭക്ഷണം, 10 ലക്ഷം പുതിയ വീടുകള്, 'പുതുമൈ പ്പെണ്', 'തമിഴ് പുതല്വന്' പദ്ധതികളിലെ പ്രോത്സാഹന തുക 1000 രൂപയില് നിന്ന് 1500 രൂപ ആയി വര്ധിപ്പിക്കല്, വാര്ദ്ധക്യകാല പെന്ഷന് 1200-ല് നിന്ന് 2000 രൂപ ആയി ഉയര്ത്തല് തുടങ്ങിയ സുപ്രധാന പ്രഖ്യാപനങ്ങളും പ്രകടനപത്രികയിലുണ്ട്.
20 ലക്ഷത്തിലധികം ഗുണഭോക്താക്കള്ക്ക് സൗജന്യ വൈദ്യുതി നല്കുന്നത് തുടരും, മീറ്ററില്ലാത്ത പമ്പ് സെറ്റുകള് നല്കും, വിദ്യാഭ്യാസ മേഖലയില്, ഉന്നത പഠനം നടത്തുന്ന 35 ലക്ഷം വിദ്യാര്ത്ഥികള്ക്ക് ലാപ്ടോപ്പുകള് വിതരണം ചെയ്യും. സര്ക്കാര് സൗകര്യങ്ങളിലെ ഡയാലിസിസ് യൂണിറ്റുകളുടെ എണ്ണം ഇരട്ടിയാക്കും എന്നിങ്ങനെയാണ് മറ്റ് പ്രഖ്യാപനങ്ങള്.
ഏപ്രില് 23-നാണ് തമിഴ്നാട് നിയമസഭാ തിരഞ്ഞെടുപ്പ് നടക്കുന്നത്. മാര്ച്ച് 30 മുതല് ഏപ്രില് 6 വരെയാണ് സ്ഥാനാര്ത്ഥി നിര്ദ്ദേശ പത്രിക സമര്പ്പിക്കാനുള്ള സമയം. തിരഞ്ഞെടുപ്പ് തീയതി അടുത്തതോടെ പാര്ട്ടികള് സ്ഥാനാര്ത്ഥി നിര്ണയത്തിലും പ്രചാരണങ്ങളിലും സജീവമായി. ഈ തിരഞ്ഞെടുപ്പില് ഡിഎംകെ-യുടെ മതേതര പുരോഗമന സഖ്യവും എഐഎഡിഎംകെ-ബിജെപിയുടെ ദേശീയ ജനാധിപത്യ സഖ്യവുമാണ് പ്രധാന എതിരാളികള്.
ഇത് കൂടാതെ, നാം തമിഴര് കക്ഷി, തമിഴക വെട്രി കഴകം പോലുള്ള പാര്ട്ടികളും ഒറ്റയ്ക്ക് മത്സരിക്കുന്നുണ്ട്. അതുകൊണ്ട് 2026-ലെ നിയമസഭാ തിരഞ്ഞെടുപ്പില് ശക്തമായ നാല് മുന്നണി മത്സരത്തിനാണ് കളമൊരുങ്ങിയിരിക്കുന്നത്. ഡിഎംകെയുടെ നേതൃത്വത്തിലുള്ള മതേതര പുരോഗമന സഖ്യത്തില് ഒട്ടേറെ പ്രമുഖ പാര്ട്ടികളാണുള്ളത്. ഡിഎംകെയാണ് കൂടുതല് സീറ്റില് മത്സരിക്കുന്നത്.
കോണ്ഗ്രസിന് 28 സീറ്റുകള്, മറുമലര്ച്ചി ദ്രാവിഡ മുന്നേറ്റ കഴകം (എംഡിഎംകെ) 4, മനിതനേയ മക്കള് കക്ഷി 2, കൊങ്ങുനാട് മക്കള് ദേശീയ കക്ഷി 2, ഇന്ത്യന് യൂണിയന് മുസ്ലിം ലീഗ് 2, സിപിഐ 5, സിപിഎം. 5, വിടുതലൈ സിറുതൈഗള് കക്ഷി 8, ദേസിയ മുര്പോക ദ്രാവിഡ കഴകം (ഡിഎംഡികെ) 10 എന്നിങ്ങനെയാണ് സഖ്യകക്ഷികള്ക്ക് ലഭിച്ച സീറ്റുകള്.
അതേസമയം, എഐഎഡിഎംകെ ജനറല് സെക്രട്ടറി എടപ്പാടി പളനിസ്വാമി തങ്ങളുടെ സര്ക്കാര് അധികാരത്തിലെത്തിയാല് നടപ്പാക്കാന് ഉദ്ദേശിക്കുന്ന നിരവധി പദ്ധതികള് നേരത്തെ പ്രഖ്യാപിച്ചിട്ടുണ്ട്. റേഷന് കാര്ഡുള്ള കുടുംബങ്ങള്ക്ക് സൗജന്യമായി ഫ്രിഡ്ജ്, ഓരോ കുടുംബത്തിനും 10,000 രൂപ ധനസഹായം, പ്രതിവര്ഷം മൂന്ന് പാചക വാതക സിലിണ്ടറുകള് സൗജന്യമായി നല്കല് എന്നിവ ഈ പ്രഖ്യാപനങ്ങളില്പ്പെടുന്നു.
Click it and Unblock the Notifications
Sign in with Google