ശ്രീനഗറില്‍ പാക് അനുകൂലികള്‍ ജെഎന്‍യുവിന് നന്ദി അറിയിച്ചു, പ്രതിഷേധം ശക്തം

ശ്രീനഗര്‍: ജെഎന്‍യു വിദ്യാര്‍ത്ഥികളെ പിന്തുണച്ച് പാക് അനുകൂലികളുടെ പ്രതിഷേധം ശക്തം. ശ്രീനഗറിലാണ് അഫ്‌സല്‍ ഗുരു അനുകൂലികളും സുരക്ഷാ ഉദ്യോഗസ്ഥരും തമ്മില്‍ ഏറ്റുമുട്ടിയത്. പ്രതിഷേധത്തില്‍ ജെഎന്‍യു വിദ്യാര്‍ത്ഥികള്‍ക്ക് പിന്തുണയും പ്രഖ്യാപിച്ചു. വെള്ളിയാഴ്ച പ്രാര്‍ത്ഥന കഴിഞ്ഞ് ഒത്തുകൂടിയ ജനങ്ങള്‍ സുരക്ഷ ഉദ്യോഗസ്ഥര്‍ക്ക് നേരെ കല്ലെറിയുകയായിരുന്നു.

പ്രതിഷേധത്തില്‍ പങ്കെടുത്ത അഫ്‌സല്‍ ഗുരു അനുകൂലികള്‍ പാക് പതാകയുയര്‍ത്തുകയും ചെയ്തു. കൂടാതെ ഐസിസ് തീവ്രവാദികളുടെ പതാകയും പ്രതിഷേധത്തിനിടെ ഉയര്‍ന്നു. താങ്ക് ജെഎന്‍യു എന്ന എഴുത്താണ് പതാകയിലുണ്ടായിരുന്നത്. പതാക ഉയര്‍ത്തിയും പാക് അനുകൂല മുദ്രാവാക്യം മുഴക്കുകയും ചെയ്തിരുന്നു.

ഇത്തരം പ്രതിഷേധങ്ങള്‍ ശ്രീനഗറിലും മറ്റും സ്ഥിരം സംഭവമാണ്. അതുകൊണ്ടുതന്നെ സുരക്ഷയ്ക്കായി കൂടുതല്‍ പോലീസ് ഉദ്യോഗസ്ഥരെയും വിന്യസിപ്പിച്ചിട്ടുണ്ട്. മുഖം മറച്ചു കൊണ്ടാണ് പലരും പ്രതിഷേധ പരിപാടിയില്‍ പങ്കെടുത്തത്. പാര്‍ലമെന്റ് ആക്രമണത്തിന് പിന്നില്‍ പ്രവര്‍ത്തിച്ച ഭീകരന്‍ അഫ്‌സല്‍ ഗുരുവിന് അനുകൂലിച്ചായിരുന്നു ഇവരുടെ മുദ്രാവാക്യങ്ങള്‍.

അതേസമയം, രാജ്യദ്രോഹ കുറ്റത്തിനായി അറസ്റ്റ് ചെയ്ത ജെഎന്‍യു യൂണിയന്‍ പ്രസിഡന്റ് കനയ്യ കുമാറിന്റെ ജാമ്യാപേക്ഷ സുപ്രീംകോടതി പരിഗണിച്ചില്ല. ജാമ്യത്തിനായി ഹൈക്കോടതിയെയാണ് ആദ്യം സമീപിക്കേണ്ടതെന്ന് സുപ്രീംകോടതി പറയുകയായിരുന്നു.

English summary

The protesters raised slogans, waved flags and carried 'Thank You JNU' posters. Soon after the Friday prayers were over, clashes broke out between the police and protesters.