ടീച്ചര്‍ കള്ളിയെന്ന് വിളിച്ചു; സ്‌കൂള്‍ കെട്ടിടത്തിന് മുകളില്‍ നിന്ന് ചാടി വിദ്യാര്‍ത്ഥിനി

Updated: Sunday, November 27, 2022, 19:39 [IST]

ചെന്നൈ: തമിഴ്‌നാട്ടിലെ സ്‌കൂള്‍ കെട്ടിടത്തില്‍ നിന്ന് പത്താം ക്ലാസ് വിദ്യാര്‍ത്ഥിനി താഴേക്ക് ചാടി. അധ്യാപിക കള്ളി എന്ന് വിളിച്ച് ആക്ഷേപിച്ചതില്‍ മനംനൊന്താണ് പെണ്‍കുട്ടി കെട്ടിടത്തിന് മുകളില്‍ നിന്ന് ചാടിയത്. പരിക്കേറ്റ വിദ്യാര്‍ത്ഥിയെ ആശുപത്രിയില്‍ പ്രവേശിപ്പിച്ചിരിക്കുകയാണ്.

തമിഴ്നാട്ടിലെ കരൂരിലെ സര്‍ക്കാര്‍ സ്‌കൂളിന്റെ ഒന്നാം നിലയില്‍ നിന്നാണ് പത്താം ക്ലാസ് വിദ്യാര്‍ത്ഥിനി താഴേക്ക് ചാടിയത് വിദ്യാര്‍ത്ഥി കാല്‍തെറ്റി വീണതാണ് എന്നാണ് ആദ്യം കരുതിയത്. എന്നാല്‍ പിന്നീട് പെണ്‍കുട്ടി സംഭവം വിശദീകരിക്കുന്ന വീഡിയോ പുറത്തായതോടെ ആണ് അധ്യാപികയുടെ പങ്ക് വ്യക്തമായത്.

പെണ്‍കുട്ടിയുടെ വാക്കുകള്‍ ഇങ്ങനെയാണ്... ഞങ്ങളുടെ സ്‌കൂളില്‍ സാംസ്‌കാരിക പരിപാടികള്‍ നടക്കുകയായിരുന്നു. അപ്പോള്‍ ഒരു പെണ്‍കുട്ടി വന്ന് പരിപാടിയുടെ വീഡിയോ എടുത്ത് തരാന്‍ എന്നോട് ആവശ്യപ്പെട്ടു. എന്നാല്‍ ഞാന്‍ ആദ്യം അത് നിരസിച്ചു. അപ്പോള്‍ ആ പെണ്‍കുട്ടി മറ്റൊരാള്‍ക്ക് ഫോണ്‍ കൈമാറാന്‍ എന്നോട് ആവശ്യപ്പെട്ടു.

എന്നാല്‍ ഫോണ്‍ കൈമാറേണ്ട ആള്‍ അകലെ ആയതിനാല്‍ ഞാന്‍ തന്നെ വീഡിയോ എടുത്തു. ഇത് കണ്ട ടീച്ചര്‍ എന്നെ പിടിച്ച് ശകാരിച്ചു. എന്നാല്‍ താന്‍ ഇത് മറ്റൊരാള്‍ ആവശ്യപ്പെട്ടത് കൊണ്ട് ചെയ്തകതാണ് എന്നും ടീച്ചറോട് പറഞ്ഞു. എന്നാല്‍ ടീച്ചര്‍ എന്നെ വിശ്വസിച്ചില്ല.

അവിടെ ഉള്ള എല്ലാവരുടെയും മുമ്പില്‍ വെച്ച് എന്നെ കള്ളി എന്ന് വിളിച്ചു. എല്ലാവരും ഇത് നോക്കി നില്‍ക്കുന്നുണ്ടായിരുന്നു. എന്റെ ഹൃദയം തകര്‍ന്നു, എന്നാണ് പെണ്‍കുട്ടി വീഡിയോയില്‍ പറയുന്നത്. അതേസമയം സംഭവത്തില്‍ അന്വേഷണം നടന്നുവരികയാണ് എന്ന് പൊലീസ് പറഞ്ഞു.