'ഇതാണ് ഐഎസ്ആർഒ ചെയർമാന്റ് മാസശമ്പളം, ഇത് ന്യായമാണോ?'; വെളിപ്പെടുത്തി ഹര്‍ഷ് ഗോയങ്ക

Updated: Tuesday, September 12, 2023, 17:38 [IST]

ഡൽഹി: ഐ എസ് ആർ ഒ ചെയർമാൻ എസ് സോമനാഥിന്റെ ശമ്പളത്തെ കുറിച്ച് എക്സ് പ്ലാറ്റ്ഫോമിൽ ചർച്ച കൊഴുക്കുക്കുന്നു. ആർ പി ജി ഗ്രൂപ്പ് ചെയർമാനായ ഹർഷ് ഗോയങ്കയാണ് ചർച്ചയ്ക്ക് തിരികൊളുത്തിയത്. പ്രതിമാസം 2.5 ലക്ഷം രൂപയാണ് സോമനാഥിന്റെ ശമ്പളമെന്നും ഇത് ന്യായമാണോയെന്നുമുള്ള ഗോയങ്കയുടെ പോസ്റ്റാണ് ചർച്ചയ്ക്ക് കാരമായത്.

'ഐ എസ് ആർ ഒ ചെയർമാൻ സോമനാഥിന്റെ പ്രതിമാസ ശമ്പളം 2.5 ലക്ഷം രൂപയാണ്. ഇത് ശരിക്കും ന്യായമാണോ? പണത്തിനപ്പുറമുള്ള കാര്യങ്ങളിൽ പ്രചോദിതരാണ് അദ്ദേഹത്തെപ്പോലുള്ളവർ എന്ന് നമുക്ക് മനസ്സിലാക്കാം. ശാസ്ത്രത്തോടും ഗവേഷണങ്ങളോടുമുള്ള അവരുടെ അടങ്ങാത്ത അഭിനിവേശവും അർപ്പണ ബോധവും കാരണം അവർ എന്തും ചെയ്യും, രാജ്യത്തിന്റെ അഭിമാനം കാക്കാൻ വേണ്ടി, അവരുടെ രാജ്യത്തിന് വേണ്ടി സംഭാവന ചെയ്യും,അദ്ദേഹത്തെപ്പോലുള്ള സമർപ്പിതരായ ആളുകൾക്ക് മുന്നിൽ ഞാൻ ശിരസ് നമിക്കുന്നു', എന്നാണ് ഹർഷ് ഗോയങ്ക് കുറിച്ചത്. അതേസമയം ഗോയങ്കിന്റെ പോസ്റ്റിന് കീഴെ നിരവധി പേരാണ് കമന്റുമായെത്തിയത്.

ഐ എസ് ആർ ഒ ചെയർമാൻ സോമനാഥിനെപ്പോലുള്ള വ്യക്തികളുടെ അർപ്പണബോധവും അഭിനിവേശവും അളവറ്റതാണെന്നായിരുന്നു ഒരാൾ കുറിച്ചത്. ശാസ്ത്രം, ഗവേഷണം, അവരുടെ രാജ്യത്തിന്റെ ഉന്നമനം എന്നിവയോടുള്ള അഗാധമായ പ്രതിബദ്ധതയാൽ നയിക്കപ്പെടുന്നവരാണവർ. പണത്തിന് അതീതമാണ് അവരുടെ പ്രവൃത്തികൾ. അവർ യഥാർത്ഥ പ്രചോദനങ്ങളാണ്, സമൂഹത്തിന് അവരുടെ സംഭാവനകൾ വിലമതിക്കാനാവാത്തതാണ്', പോസ്റ്റിൽ അദ്ദേഹം പറഞ്ഞു.

'സാമിനാഥിന് കുറഞ്ഞത് മാസം 25 ലക്ഷമോ അതിൽ കൂടുതലോ ലഭിക്കണം. കഴിവുകൾ തിരിച്ചറിഞ്ഞാകണം പ്രതിഫലം നൽകേണ്ടത്', എന്നായിരുന്നു മറ്റൊരാൾ പോസ്റ്റിൽ പറഞ്ഞത്.

എന്നാൽ ഗോയങ്ക പറഞ്ഞത് അദ്ദേഹത്തിന്റെ അടിസ്ഥാന ശമ്പളം മാത്രമാണെന്നായിരുന്നു മറ്റൊരാൾ കുറിച്ചത്. അദ്ദേഹത്തിന് മറ്റ് ആനുകൂല്യങ്ങൾ ലഭിക്കുന്നുണ്ടാകുമെന്നും അദ്ദേഹം കുറിച്ചു. ശാസ്ത്രജ്ഞരെ എപ്പോഴും നല്ല രീതിയിൽ പരിഗണിക്കണം. സ്വകാര്യമേഖലയിൽ അവർക്ക് പലമടങ്ങ് സമ്പാദിക്കാമായിരുന്നു എന്നതും വസ്തുതയാണ്. എന്നാൽ ഡോക്ടർമാർ, ജഡ്ജിമാർ, ഗവേഷകർ, മറ്റ് പല പ്രൊഫഷണലുകളുടെ കാര്യത്തിൽ ഇക്കാര്യം ബാധകമാണ്ട, അദ്ദേഹം കമന്റിൽ പറഞ്ഞു.

2022 ലാണ് ഐ എസ് ആർ ഒയുടെ ചെയർമാനായി മലയാളിയായ എസ് സോമനാഥ് നിയമിതനായത്. അദ്ദേഹത്തിന് കീഴിലാണ് ഐ എസ് ആർ ഒ രാജ്യത്തിന്റെ അഭിമാന ദൗത്യമായ ചന്ദ്രയാൻ 3 വിക്ഷേപിച്ചത്.