മോദിക്ക് വോട്ട് ചെയ്യുന്നവര്‍ കടലില്‍ ചാടണമെന്ന്

ശ്രീനഗര്‍: ബിജെപി പ്രധാനമന്ത്രി സ്ഥാനാര്‍ത്ഥി നരേന്ദ്രമോദിയ്ക്ക് വോട്ട് ചെയ്യുന്നവര്‍ കടലില്‍ ചാടണമെന്ന് കേന്ദ്രമന്ത്രിയും നാഷണല്‍ കോണ്‍ഫറന്‍സ് നേതാവ് ഫറൂഖ് അബ്ദുള്ള. മോദി വിമര്‍ശകര്‍ പാകിസ്താനിലേയ്ക്ക് പോകണമെന്ന ബിജെപി വക്താവ് ഗിരിരാജ് സിംഗിന്റെ പ്രസ്താവനയ്ക്കുള്ള മറുപടിയായിരുന്നു ഫറൂഖ് അബ്ദുള്ളയുടെ വാക്കുകള്‍. സംഗതി വിവാദമായതോടെ ഗിരിരാജ് സിംഗിനെ പഴി പറഞ്ഞ് രക്ഷപ്പെടാനൊരുങ്ങുകയാണ് കേന്ദ്രമന്ത്രി

താന്‍ ഗിരിരാജ് സിംഗിന്റെ പ്രസ്താവനയ്ക്ക് അതേ നാണയത്തില്‍ മറുപടി നല്‍കിയതതാണെന്നാണ് ഫറൂഖ് അബ്ദുള്ള പറയുന്നത്. ഝാര്‍ഖണ്ഡില്‍ നടത്തിയ തിരഞ്ഞെടുപ്പ് റാലിയ്ക്കിടെയാണ് ഗിരിരാജ് സിംഗ് വിവാദ പരാമര്‍ശം നടത്തിയത്.

മോദിയെ വിമര്‍ശിയ്ക്കുന്നവര്‍ക്ക് ഇന്ത്യയില്‍ നില്‍ക്കാന്‍ യോഗ്യതയില്ലെന്നും പാകിസ്താനിലേയ്ക്ക് പോകണമെന്നുമാണ് ഗിരിരാജ് സിംഗ് പ്രസ്താവന നടത്തിയത്. മോദി വിമര്‍ശകരെപ്പറ്റി സിംഗ് പറഞ്ഞസപ്പോള്‍ അനുകൂലികള്‍ കടലില്‍ ചാടണമെന്നായി ഫറൂഖ് അബ്ദുള്ളയുടെ പ്രസ്താവന.

ഗിരിരാജിനെപ്പോലുള്ളവര്‍ ഇന്ത്യക്കാര്‍ക്കിടയില്‍ ഭിന്നതയുണ്ടാക്കാന്‍ ശ്രമിയ്ക്കുകയാണെന്നും രാജ്യത്തെ ഐക്യവും സാഹോദര്യവും കാത്ത് സൂക്ഷിയ്‌ക്കേണ്ടത് ഈ അവസരത്തില്‍ ഏറെ അനിവാര്യമാണെന്നും ഫറൂഖ് അബ്ദുള്ള പറഞ്ഞു.