ബീഫ് തിന്നുന്നവര്ക്ക് തൊഗാഡിയയുടെ താക്കീത്
ദില്ലി: ബീഫ് പ്രേമികള്ക്ക് വിശ്വ ഹിന്ദു പരിഷത് നേതാവ് പ്രവീണ് തൊഗാഡിയയുടെ താക്കീത്. ഇന്ത്യന് സംസ്കാരത്തിന്റെ പ്രതികരണം അനുഭവിക്കേണ്ടി വരുമെന്നാണ് രാജ്യത്തെ ബീഫ് പ്രേമികള്ക്ക് തൊഗാഡിയ മുന്നറിയിപ്പ് നല്കുന്നത്. ഏത് രാജ്യത്തായാലും ആ രാജ്യത്തെ സംസ്കാരത്തെ ബഹുമാനിക്കുക തന്നെ വേണം.
ആര്ക്കെങ്കിലും ഏതെങ്കിലും രാജ്യത്തെ സംസ്കാരത്തെ അവഹേളിക്കണം എന്ന് തോന്നിയാല് അതിനുള്ള പ്രതികരണങ്ങള് അനുഭവിക്കേണ്ടി വരും. ഇന്ത്യന് സംസ്കാരം പ്രതികരിക്കുക തന്നെ ചെയ്യും. പള്ളി ആക്രമണങ്ങളുടെ പേരില് ക്രിസ്തീയ മത വിശ്വാസികള് തെറ്റായ അജണ്ട പ്രചരിപ്പിക്കുകയാണ് എന്നും തൊഗാഡിയ കുറ്റപ്പെടുത്തി.
പാകിസ്താനിലും സിറിയയിലും പള്ളികള് ആക്രമിക്കപ്പെട്ടിട്ടുണ്ട്. എല്ലാത്തിനും ഹിന്ദുക്കളെ മാത്രം കുറ്റം പറഞ്ഞിട്ട് കാര്യമില്ല. മറ്റ് സ്ഥലങ്ങളിലെ ആക്രമണങ്ങള്ക്കും വി എച്ച് പിയാണോ കാരണക്കാര്. നിങ്ങളുടെ പക്കല് തെളിവുകള് ഉണ്ടെങ്കില് ഞങ്ങള്ക്കെതിരെ നടപടി എടുക്കൂ. ഹിസാറില് പള്ളി അനുവദിക്കുന്നതിന് പകരമായി വത്തിക്കാനില് ഹനുമാന് ക്ഷേത്രം പണിയണമെന്നും തൊഗാഡിയ പറഞ്ഞു
ജമ്മു കാശ്മീരിലെ മുഖ്യമന്ത്രി മുഫ്തി മുഹമ്മദ് സയ്യീദ് രാജ്യ താല്പര്യങ്ങള്ക്ക് വിരുദ്ധമായിട്ടാണ് പ്രവര്ത്തിക്കുന്നത് എന്ന് തൊഗാഡിയ കുറ്റപ്പെടുത്തി. തൊട്ടുകൂടായ്മ ഇല്ലാതാക്കുന്നതിന് വേണ്ടി ദേശീയ യാത്രയ്ക്ക് ഒരുങ്ങുകയാണ് തൊഗാഡിയ. ഹിന്ദുമതത്തിലെ ഉയര്ന്ന ജാതിക്കാര് ഓരോ ദളിത് കുടുംബങ്ങളെയെങ്കിലും കൂട്ടുകാരായി കാണണമെന്നാണ് തൊഗാഡിയ പറയുന്നത്.