ഫോണില് സംസാരിച്ചുകൊണ്ടിരിക്കെ കോള് നിന്നുപോയാല് പണം ലഭിക്കും!!
ദില്ലി: മൊബൈല് ഫോണില് സംസാരിക്കുമ്പോള് നിങ്ങളുടെ കോള് നിന്നു പോകുന്നുണ്ടോ... എങ്കില് ഇനി ദേഷ്യം പിടിക്കേണ്ടി വരില്ല. കോള് നിന്നുപോകുന്നവര് ഭാഗ്യവാന്മാരായിരിക്കും. കാരണം, കോള് നിന്നു പോയാല് നിങ്ങള്ക്ക് പണം ലഭിക്കും. അതെന്തു വിദ്യ എന്നു ഓര്ത്ത് തല പുകയ്ക്കേണ്ട.
മൊബൈല് ഫോണില് സംസാരിച്ചുകൊണ്ടിരിക്കെ കോള് നിന്നുപോയാല് ഉപഭോക്താക്കള്ക്ക് നഷ്ടപരിഹാരം നല്കണമെന്നാണ് ടെലികോം റഗുലേറ്ററി അതോറിറ്റി ഓഫ് ഇന്ത്യയുടെ നിര്ദ്ദേശം. കോള് ഡ്രോപ്പിന് കമ്പനികള് ഉപഭോക്താക്കള്ക്ക് നഷ്ടപരിഹാരം നല്കണമെന്ന് ട്രായ് അറിയിച്ചു.
നഷ്ടപരിഹാരമായി എത്ര തുക നല്കുമെന്നതിനെക്കുറിച്ച് വ്യക്തമാക്കിയിട്ടില്ല. ട്രായിയുടെ ശുപാര്ശ കേന്ദ്ര ടെലികോം മന്ത്രാലയത്തിന് കൈമാറുകയും ചെയ്തു. സംസാരിച്ചുകൊണ്ടിരിക്കെ കോള് നിന്നു പോകുന്ന അവസ്ഥ വര്ദ്ധിച്ചു വരുന്ന സാഹചര്യത്തിലാണ് ഇത്തരം നടപടിയിലേക്ക് നീങ്ങിയത്. രാജ്യത്തെ ടെലികോം കമ്പനികളുടെ സേവനം അപര്യാപ്തമാണെന്നാണ് ട്രായി വ്യക്തമാക്കുന്നത്.
എന്നാല്, ഉപഭോക്താക്കള്ക്ക് നഷ്ടപരിഹാരം നല്കാനാകില്ലെന്നാണ് ടെലികോം കമ്പനികള് അറിയിച്ചത്. കോള് കട്ടാകുന്ന പ്രശ്നത്തില് ഉടന് നടപടി സ്വീകരിക്കണമെന്ന് ടെലികോം മന്ത്രാലയത്തോട് പ്രധാനമന്ത്രി നരേന്ദ്രമോദിയും നിര്ദ്ദേശിച്ചിരുന്നു. ഒരു കോള് കട്ടായി വീണ്ടും വിളിക്കുമ്പോള് കമ്പനിക്ക് കൂടുതല് സാമ്പത്തിക വരുമാനം ലഭിക്കുന്നുണ്ട്. അതുകൊണ്ടാണ് ഈ പ്രശ്നം പരിഹരിക്കാന് കമ്പനികള് തയ്യാറാകാത്തതും.