റെയില്‍വേ ഓണ്‍ലൈന്‍ ബുക്കിങ് സൗകര്യം മാസത്തില്‍ 6 തവണ മാത്രമായി വെട്ടിചുരുക്കി

തിരുവനന്തപുരം: ട്രെയിന്‍ ടിക്കറ്റുകള്‍ ഓണ്‍ലൈന്‍ വഴി ബുക്ക് ചെയ്യുന്നവര്‍ക്ക് തിരിച്ചടിയായി റെയില്‍വേയുടെ പുതിയ നിയന്ത്രണം. ഐആര്‍ടിസി വഴി ബുക്ക് ചെയ്യുന്ന ടിക്കറ്റുകള്‍ക്കാണ് കടുത്ത നിയന്ത്രണം ഏര്‍പ്പെടുത്തിയിരിക്കുന്നത്.

ഒരു മാസത്തില്‍ പത്ത് തവണ ഓണ്‍ലൈന്‍ വഴി ടിക്കറ്റ് ബുക്ക് ചെയ്യാനുള്ള സംവിധാനത്തെ ആറിലേക്ക് ചുരുക്കി കൊണ്ടാണ് പുതിയ ഭേദഗതി വരുത്തിയിരിക്കുന്നത്. ഫെബ്രുവരി 15 മുതല്‍ ഒരു മാസം ഒരു അക്കൗണ്ടില്‍ നിന്നും ആറ് തവണയാണ് ടിക്കറ്റുകള്‍ ബുക്ക് ചെയ്യാന്‍ കഴിയുന്നത്.

സാധാരണ യാത്രക്കാര്‍ക്ക് ഒരു മാസത്തില്‍ ആറ് തവണയില്‍ കൂടുതല്‍ ഓണ്‍ലൈന്‍ ടിക്കറ്റ് ബുക്ക് ചെയ്യുന്നതിന്റെ ആവശ്യമില്ലെന്നാണ് മന്ത്രാലയത്തിന്റെ വിശദീകരണം. ബാക്കിയുള്ള വിഭാഗങ്ങള്‍ ഓണ്‍ലൈന്‍ സംവിധാനത്തിലൂടെ ബുക്കിങ് ചെയ്യുന്ന ടിക്കറ്റുകള്‍ മറിച്ച് വില്‍ക്കുന്നു എന്നും മന്ത്രാലയം നിരീക്ഷിച്ചു.

റെയില്‍വേ സ്റ്റേഷനില്‍ മണിക്കൂറുകള്‍ കാത്തുനില്‍ക്കുന്ന ക്യൂവില്‍ നിന്നും രക്ഷപ്പെടുന്നതിനുള്ള മാര്‍ഗമായിരുന്ന ഓണ്‍ലൈന്‍ ബുക്കിങ്. തല്‍ക്കാല്‍ ടിക്കറ്റുകളുടെ കാര്യത്തിലും ഈ മാസത്തില്‍ നിയന്ത്രണം വരുത്തിയിരുന്നു. റിസര്‍വേഷനില്ലാത്ത ടിക്കറ്റുകള്‍ക്ക് മൂന്ന് മണിക്കൂറിനുള്ളില്‍ യാത്ര ചെയ്യണം എന്നായിരുന്നു തീരുമാനം.

English summary

train e ticket restricted for six times in a month