പീഡനം:ചാനല് എഡിറ്റര് അറസ്റ്റില്
ചെന്നൈ: ലൈംഗിക പീഡന കേസില് തമിഴ്നാട്ടിലെ ചാനല് എഡിറ്റര് അറസ്റ്റില്. ക്യാപ്റ്റന് ടിവി ചാനലിന്റെ ന്യൂസ് എഡിറ്റര് ആണ് അറസ്റ്റിലായത്. തമിഴ് സിനിമ താരവും രാഷ്ട്രീയ നേതാവും ആയ വിജയകാന്തിന്റെ ഉടമസ്ഥതയിലുള്ള ചാനലാണ് ക്യാപ്റ്റന് ടിവി.
ചാനലില് മാധ്യമപ്രവര്ത്തകയായിരുന്ന സ്ത്രീ ആണ് പരാതി നല്കിയത്. ഇവരെ ചാനലില് നിന്ന് പിരിച്ചുവിട്ടതായിരുന്നു.
ക്യാപ്റ്റന് ടിവിയുടെ ന്യൂസ് എഡിറ്റര് ദിനേശിനെയാണ് പോലീസ് ഡിസംബര് 22 ന് രാവിലെ അറസ്റ്റ് ചെയ്തത്. എന്നാല് കേസ് മനപ്പൂര്വ്വം കെട്ടിച്ചമച്ചതാണെന്നാണ് ക്യാപ്റ്റന് ടിവി അധികൃതരുടെ പ്രതികരണം. അറസ്റ്റിലായ ദിനേശിനെ കോടതിയില് ഹാജാക്കി. കോടതി ഇയാളെ ജനുവരി മൂന്ന് വരെ റിമാന്ഡ് ചെയ്തിരിക്കുകയാണ്.
പരാതിക്കാരി ക്യാപ്റ്റന് ടിവിയിലെ ജൂനിര് പത്രപ്രവര്ത്തക ആയിരുന്നു. ഒരുമാസം മുമ്പാണ് ഇവരെ ജോലിയില് നിന്ന് പിരിച്ചിവിട്ടത്. ഇതിന്റെ പ്രതികാരം തീര്ക്കാനാണ് ഇപ്പോള് സ്ത്രീ പീഡനം എന്ന പരാതിയുമായി കരംഗത്തെത്തിയിരിക്കുന്നത് എന്നാണ് ക്യാപ്റ്റന് ടിവിയുടെ ആരോപണം.
തെഹല്ക എഡിറ്റര് തരുണ് തേജ്പാല് സഹപ്രവര്ത്തകയെ പീഡിപ്പിച്ച കേസില് അറസ്റ്റിലായതിന് പിറകേയാണ് മറ്റൊരു മാധ്യമ സ്ഥാപനത്തില് സമാനമായ പ്രശ്നം റിപ്പോര്ട്ട് ചെയ്യപ്പെടുന്നത്. സഹപ്രവര്ത്തകയും മകളുടെ സുഹൃത്തുമായ മാധ്യമപ്രവര്ത്തകയോട് അപമര്യാദയായി പെരുമാറിയ കേസിലാണ് തരുണ് തേജ്പാല് അറസ്റ്റിലായത്. ഈ സംഭവം ദേശീയ രാഷ്ട്രീയത്തില് വന് കോളിളക്കം സൃഷ്ടിച്ചിരുന്നു.