നടി ട്വിങ്കില്‍ ഖന്ന ശ്രീ ശ്രീ രവിശങ്കറെ അപമാനിച്ചോ?

By Anwar Sadath

Updated: Wednesday, May 11, 2016, 8:41 [IST]

ദില്ലി: ബോളിവുഡ് താരം ട്വിങ്കള്‍ ഖന്ന തന്റെ വാക്കുകളിലെ തമാശകൊണ്ട് മറ്റുള്ളവരെ ആകര്‍ഷിക്കുന്നതില്‍ മിടുക്കുകാട്ടാറുണ്ട്. സിനിമകളില്‍ നിന്നും മാറി നില്‍ക്കുകയാണെങ്കിലും കോളമെഴുത്തുവഴി പഴയ ആരാധകരുമായും യുവ ആരാധകരുമായും അവര്‍ ബന്ധം പുലര്‍ത്തുന്നു. തമാശകള്‍ക്കിടയിലുണ്ടാകുന്ന നാക്കുപിഴ അവര്‍ക്ക് പലപ്പോഴും വിനയായിട്ടുമുണ്ട്.

കഴിഞ്ഞദിവസം ശ്രീ ശ്രീ രവിശങ്കറിനെതിരായ പരാമര്‍ശത്തിലും നടി പുലിവാലു പിടിച്ചു. രവിശങ്കര്‍ നൊബേല്‍ ജേതാവ് മലാല യുസഫ് സായിയെക്കുറിച്ച് പറഞ്ഞതാണ് ട്വിങ്കള്‍ ഖന്നയെ പ്രതികരിക്കാന്‍ പ്രേരിപ്പിച്ചത്. കുട്ടികളുടെ വിദ്യാഭ്യാസത്തിനും ക്ഷേമത്തിനുമായി പ്രവര്‍ത്തിക്കുന്ന മലാല നൊബേല്‍ സമ്മാനത്തിന് അര്‍ഹയല്ലെന്നായിരുന്നു രവിശങ്കറിന്റെ അഭിപ്രായം.

ശ്രീ ശ്രീ രവിശങ്കറിന് നൊബേല്‍ ഫൂട്ട് ലഭിച്ചെന്നും യോഗ ചെയ്യുന്നതിനിടെ രവിശങ്കറിന്റെ താടിയില്‍ പകുതിഭാഗം അദ്ദേഹത്തിന്റെ വായില്‍ കുടുങ്ങിയെന്നുമായിരുന്നു ഇതിനെതിരെ ട്വിങ്കിള്‍ ഖന്ന ട്വിറ്ററിലൂടെ പ്രതികരിച്ചത്. ട്വീറ്റിന് പിന്നാലെ ആര്‍ട്ട് ഓഫ് ലിവിങ് പിന്തുടരുന്ന ഒട്ടേറെപേര്‍ ട്വിങ്കിള്‍ ഖന്നയ്‌ക്കെതിരെ വിമര്‍ശനവുമായി രംഗത്തെത്തുകയും ചെയ്തു.

തങ്ങളുടെ വിശ്വാസത്തെ ഹനിക്കുന്ന രീതിയിലാണ് ട്വിങ്കിള്‍ ഖന്നയുടെ ട്വീറ്റെന്ന് ചിലര്‍ പ്രതികരിച്ചു. ഇതോടെ, ട്വിങ്കിള്‍ ക്ഷമ പറയുകയും ചെയ്തു. ആരുടെയെങ്കിലും വിശ്വാസത്തെ വേദനിപ്പിക്കാനാല്ല താന്‍ അങ്ങിനെ പറഞ്ഞത്. ഒരു തമാശരൂപേണ പറഞ്ഞതാണ്. അത് അത്തരത്തില്‍ ഉള്‍ക്കൊള്ളുമെന്നാണ് കരുതിയിരുന്നതെന്നും ട്വിങ്കിള്‍ പറഞ്ഞു.