യോഗ പട്ടി എഴുന്നേല്ക്കുന്നത് പോലെ; സീതാറാം യെച്ചൂരിക്ക് പണി ട്വിറ്ററില്
ദില്ലി: പട്ടിയുടെ ചലനങ്ങള് ശ്രദ്ധിച്ചാല് അതില് ഈ പറയുന്ന യോഗ അതിലും കാണാം എന്ന് പറഞ്ഞ സി പി എം ജനറല് സെക്രട്ടറി സീതാറാം യെച്ചൂരിക്ക് പണി കിട്ടി. മൈക്രോ ബ്ലോഗിംഗ് വെബ്സൈറ്റായ ട്വിറ്ററിലൂടെയാണ് ആളുകള് സീതാറാം യെച്ചൂരിയുടെ വാചാടോപത്തിന് തക്ക മറുപടി കൊടുത്തത്. അന്താരാഷ്ട്ര യോഗ ദിനമായ ഞായറാഴ്ച ഭുവനേശ്വറില് വെച്ചാണ് യെച്ചൂരി ഇങ്ങനെ പറഞ്ഞത്.
ഭുവനേശ്വറില് കമ്മ്യൂണിസ്റ്റ് നേതാവായ ഹര്കിഷന് സിംഗ് സുര്ജിതിന്റെ ജന്മദിനാഘോഷ പരിപാടിയില് സംസാരിക്കുകയായിരുന്നു യെച്ചൂരി. യോഗയുടെ എല്ലാ ചലനങ്ങളും ഒരു പട്ടിയിലും കാണാം. ഒരു പട്ടി കിടന്ന കിടപ്പില് നിന്നും എഴുന്നേല്ക്കുമ്പോള് മുന്നിലെ രണ്ട് കാലുകളും ഊന്നി ശ്വാസമെടുക്കും. ഇത് തന്നെയാണ് യോഗയിലും ചെയ്യുന്നത്.
ഇത്തരം അഭ്യാസങ്ങള് വഴി ജനങ്ങളെ ബാധിക്കുന്ന പ്രശ്നങ്ങളില് നിന്നും ശ്രദ്ധ തിരിക്കുകയാണ് - യെച്ചൂരി പറഞ്ഞു. എന്നാല് യെച്ചൂരിയുടെ വാക്കുകളോട് അത്ര അനുഭാവത്തോടെയല്ല ട്വിറ്റരാദികള് പ്രതികരിച്ചത്. ആകപ്പാടെ ഒമ്പത് സീറ്റ് മാത്രമുള്ള ഒരു പാര്ട്ടിയുടെ സെക്രട്ടറിയാണ് യെച്ചൂരി, അദ്ദേഹം പറയുന്നതൊന്നും കാര്യമാക്കുകയേ വേണ്ട എന്നാണ് ചിലര് പറഞ്ഞത്.
ചൈനയില് മഴ പെയ്താല് ഇന്ത്യയില് കുട പിടിക്കുന്ന നേതാവാണ് യെച്ചൂരി എന്നാണ് മറ്റ് ചിലര് കളിയാക്കിയത്. യെച്ചൂരിയെപോലുള്ളവര് നയിക്കുന്ന സി പി എമ്മിന് ഈ സ്ഥിതി വന്നില്ലെങ്കിലേ അത്ഭുതമുള്ളൂ എന്നായിരുന്നു ഒരു ട്വീറ്റ്. ഇക്കഴിഞ്ഞ ഏപ്രില് മാസത്തിലാണ് പ്രകാശ് കാരാട്ടിന് പകരം സീതാറാം യെച്ചൂരി സി പി എമ്മിന്റെ ജനറല് സെക്രട്ടറി സ്ഥാനത്തെത്തിയത്.